തിരുവനന്തപുരം : ദാദാ സാഹേബ് ഫാൽകെ പുരസ്കാരം മോഹൻലാലിന് ലഭിച്ചതിൽ പ്രധാനമന്ത്രിക്ക് നന്ദിയുമായി കേരള ബിജെപി. ‘നന്ദി മോദി’ എന്ന് കുറിച്ചുകൊണ്ടാണ് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖരിന്റെ ഫേസ്ബുക്ക് പോസ്റ്റ്. ബിജെപി കേരളയുടെ ഔദ്യോഗിക ഫേസ്ബുക്ക് പേജിലും ‘നന്ദി മോദി’ എന്ന് കുറിച്ചിട്ടുണ്ട്. മലയാളത്തിൻ്റെ അഭിമാനതാരത്തിന് രാജ്യത്തിന്റെ പരമോന്നത ചലച്ചിത്ര പുരസ്കാരം നല്കി ആദരിച്ച പ്രധാനമന്ത്രി നരേന്ദ്ര മോദി ജിയ്ക്ക് നന്ദി. മോഹൻലാലിനപ്പുറം മലയാളികൾക്കും, മലയാള സിനിമയ്ക്കും, കേരളത്തിൻ്റെ സമ്പന്നമായ കലാപാരമ്പര്യത്തിനുമെല്ലാമുള്ള ആദരമാണ് ഈ പുരസ്കാരം.
മലയാളികളെ സംബന്ധിച്ച് സിനിമയ്ക്കും നടനമികവിനുമെല്ലാമപ്പുറമാണ് മോഹൻലാൽ. അവരുടെ അഭിമാനവും അഹങ്കാരവും ആദരവുമെല്ലാമാണ് അദ്ദേഹം. മലയാളികളുടെ ജീവിതത്തെ ഇത്രയധികം സ്വാധീനിച്ച മറ്റൊരു അഭിനേതാവുണ്ടാകില്ല. നേട്ടങ്ങളുടെ നെറുകയിൽ നില്ക്കുമ്പോഴും എല്ലാത്തിനെയും വിനയത്തോടെ ഏറ്റുവാങ്ങുന്ന വ്യക്തിത്വമാണ് അദ്ദേഹത്തിൻ്റേത്.
അദ്ദേഹത്തെ തേടി അർഹിച്ച അംഗീകാരമെത്തുമ്പോൾ അതിന് വഴിയൊരുക്കിയ മോദി സർക്കാരിന് വീണ്ടുമൊരിക്കൽക്കൂടി നന്ദി അറിയിക്കുന്നു എന്ന് കുറിച്ചുകൊണ്ടാണ് ഫേസ്ബുക്ക് പോസ്റ്റ്.
