കോട്ടയം: ജോസഫ് വാഴയ്ക്കൻ കേരളാ കോൺഗ്രസിനെ അനാവശ്യമായി കടന്നാക്രമിക്കുകയാണെന്ന് കേരളാ കോൺഗ്രസ് നേതാവ് ജയകൃഷ്ണൻ പുതിയേടത്ത്. ചാനൽ ചർച്ചകളിലും സമൂഹമാധ്യമങ്ങളിലും അദ്ദേഹം കേരളാ കോൺഗ്രസിനെ അനാവശ്യമായി കുറ്റപ്പെടുത്തിക്കൊണ്ടിരിക്കുകയാണെന്നും അദ്ദേഹം പറഞ്ഞു. പ്രാദേശിക രാഷ്ട്രീയ പാർട്ടിയായ കേരളാ കോൺഗ്രസ് എമ്മിനെ ജോസഫ് വാഴയ്ക്കൻ എന്തിനാണ് ഭയക്കുന്നതെന്നും അദ്ദേഹം ചോദിക്കുന്നു.
ജോസഫ് വാഴയ്ക്കൻ കോട്ടയം ജില്ലാ പഞ്ചായത്തിലേക്ക് മത്സരിക്കുന്ന കാലത്ത് കോൺഗ്രസ് സീറ്റിൽ മത്സരിച്ചാൽ തോൽക്കുന്ന സാഹചര്യമായിരുന്നു. അന്ന് കേരളാ കോൺഗ്രസ് എമ്മിന് സ്വാധീനമുള്ള സ്ഥലത്ത് മത്സരിക്കാൻ സഹായിക്കണമെന്ന് കെഎം മാണിയോട് അദ്ദേഹം ആവശ്യപ്പെട്ടിരുന്നു. പലയാവർത്തി ആവശ്യപ്പെട്ടതിനു ശേഷമാണ് അദ്ദേഹത്തെ മീനച്ചിലിൽ നിന്നും മത്സരിക്കാൻ അവസരം നൽകിയത്. അന്ന് മാണി കണിച്ച സന്മനസുകൊണ്ടാണ് ജോസഫ് വാഴയ്ക്കൻ എന്ന നേതാവ് രൂപപ്പെടുന്നത്. അന്നുമുതൽ ഇന്നുവരെ കേരളാ കോൺഗ്രസിനെ ആക്രമിക്കുന്ന സ്വഭാവമാണ് അദ്ദേഹം കാണിക്കുന്നതെന്നും കേരളാ കോൺഗ്രസ് എമ്മിന്റെ ഔദ്യോഗിക ഫേസ്ബുക്ക് പേജിൽ പ്രസിദ്ധീകരിച്ച വീഡിയോയിൽ പറയുന്നു.
“ജോസഫ് വാഴയ്ക്കന്‍റെ ധാർഷ്ട്യം കേരള കോൺഗ്രസ് എം പാർട്ടിയോട് വേണ്ട.മീനച്ചിലിൽ മത്സരിക്കാൻ അന്ന് വിനീതവിധേയൻ. ഇന്ന് വല്ലാത്തൊരു അസഹിഷ്ണുതയും. വിരട്ടലും വെല്ലുവിളിയും ഇങ്ങോട്ട് വേണ്ട.” എന്ന കുറിപ്പോടുകൂടിയാണ് വീഡിയോ പ്രസിദ്ധീകരിച്ചിരിക്കുന്നത്. കഴിഞ്ഞ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ ബിജെപിയെ സഹായിക്കുന്ന നിലപാടാണ് ജോസഫ് വാഴയ്ക്കൻ സ്വീകരിച്ചതെന്നും കണക്കുകൾ നിരത്തി കേരളാ കോൺഗ്രസ് ആരോപിക്കുന്നു.
തന്നെ സമൂഹമാധ്യമങ്ങൾ വഴി അപകീർത്തിപ്പെടുത്തുന്നുവെന്നാണ് ജോസഫ് വാഴയ്ക്കൻ പറയുന്നത്. അത് കയ്യിലിരിപ്പുകൊണ്ടാണെന്ന് കൂട്ടിയാൽ മതി. അതിൽ കേരളാ കോൺഗ്രസിന് പങ്കില്ല. ശൈലിയിൽ മാറ്റം വരുത്തിയില്ലെങ്കിൽ ജോസഫ് വാഴയ്ക്കന് ഇനി ജനപ്രതിനിധിയാകാൻ കഴിയുമോയെന്ന് സംശയിക്കേണ്ടിയിരിക്കുന്നു. മീനച്ചിലിൽ സ്ഥാനാർത്ഥിയാകാൻ കെ എം മാണിയുടെ കാലുപിടിച്ച് കേരളാ കോൺഗ്രസിന്റെ കുത്തക സീറ്റിൽ മത്സരിച്ച് ജയിച്ചു. എന്നാലിനി അദ്ദേഹത്തിന്റെ ശൈലിയിൽ മാറ്റം വരുത്തിയില്ലെങ്കിൽ ഇനിയൊരിക്കലും ജയിക്കാൻ കഴിഞ്ഞെന്നുവരില്ല. അതിന് കേരളാ കോൺഗ്രസിനെ പഴിക്കരുതെന്നും വീഡിയോയിൽ പറയുന്നു
