കൊച്ചി: പുതിയ തീരുമാനങ്ങളുമായി കൊച്ചി കോര്പ്പറേഷന്. മറൈന് ഡ്രൈവ് വൃത്തിയായും സുരക്ഷിതമായും സൂക്ഷിക്കുന്നതിന്റെ ഭാഗമായി രാത്രി 10 മണി മുതല് രാവിലെ അഞ്ചു മണി വരെ മറൈന് ഡ്രൈവ് വാക്ക് വേയിലേക്ക് പ്രവേശനം പൂര്ണ്ണമായും നിരോധിക്കുമെന്ന് മേയര് അനില് കുമാര് അറിയിച്ചു. മറൈന് ഡ്രൈവ് നടപ്പാതയിലെ അനധികൃത കച്ചവടക്കാരെ ഒഴിപ്പിക്കും. ജിസിഡിഎ അംഗീകൃത ബങ്ക് ഷോപ്പുകള് അല്ലാതെ മറ്റൊരു കച്ചവടവും പ്രദേശത്ത് അനുവദിക്കില്ലെന്നും മേയര് അറിയിച്ചു. മേയറുടെയും ജിസിഡിഎ ചെയര്മാന് കെ ചന്ദ്രന് പിള്ളയുടെയും നേതൃത്വത്തില് ചേര്ന്ന വിവിധ ഏജന്സികളുടെ യോഗത്തിലാണ് തീരുമാനങ്ങള്.
മറൈന് ഡ്രൈവ് നടപ്പാതയില് ജിസിഡിഎ അംഗീകൃത ബങ്ക് ഷോപ്പുകള് അല്ലാതെ മറ്റൊരു കച്ചവടവും അനുവദിക്കുന്നതല്ല. അനധികൃത കച്ചവടക്കാരെ എല്ലാം ഒഴിപ്പിക്കും. മറൈന് ഡ്രൈവ് ഷോപ്പിംഗ് മാളില് ഉണ്ടാകുന്ന ജൈവ മാലിന്യം സംസ്കരിക്കുവാന് ഒരു കമ്പോസ്റ്റിംഗ് യൂണിറ്റ് അനുയോജ്യമായ സ്ഥലത്ത് ആരംഭിക്കും. നിലവിലുള്ള സെക്യൂരിറ്റി സംവിധാനം മിലിട്ടറി റിട്ടയേര്ഡ് ഉദ്യോഗസ്ഥരുടെ സംവിധാനത്തെ ഏല്പ്പിച്ച് എണ്ണം വര്ദ്ധിപ്പിക്കും. പോലീസിന്റെയും പോര്ട്ടിന്റെയും സഹായത്തോടെ അംഗീകൃത ബോട്ട് ഉടമകളുടെ യോഗം വിളിക്കുകയും ബോട്ടില് നിന്ന് വരുന്ന മാലിന്യം സംസ്കരിക്കുന്നതിനുള്ള സംവിധാനം ഒരുക്കുകയും ചെയ്യും. അനധികൃത ബോട്ട് സര്വ്വീസുകള് പൂര്ണ്ണമായും അവസാനിപ്പിക്കും. തീരുമാനങ്ങള് 25 മുതല് ഒരു മാസത്തേയ്ക്ക് കര്ശനമായി നടപ്പിലാക്കുകയും അവലോകനം ഒക്ടോബര് 25 ന് നടത്തുകയും ചെയ്യുമെന്ന് മേയര് അറിയിച്ചു.
