മലപ്പുറം : കേരളത്തിലെ ആദ്യ പ്ലാസ്മാ ബാങ്ക് മഞ്ചേരി മെഡിക്കല് കോളേജില് പ്രവര്ത്തനം ആരംഭിച്ചു. കൊവിഡിനെ ചെറുക്കുന്ന ആന്റിബോഡി രോഗം ഭേദമായവരുടെ രക്തത്തില് നിന്നും വേര്തിരിച്ചെടുത്ത് കൊവിഡ് രോഗികളെ ചികിത്സിക്കാന് ഉപയോഗിക്കുന്ന രീതിയാണ് പ്ലാസ്മാ തെറാപ്പി.
സംസ്ഥാനത്ത് കൊവിഡ് ബാധിച്ച് അതീവ ഗുരുതരാവസ്ഥയിലായിരുന്ന രണ്ട് പേര് കൂടി പ്ലാസ്മ ചികിത്സയിലൂടെ രോഗമുക്തി നേടി ഇന്നലെ വീട്ടിലേക്ക് മടങ്ങി. അവര്ക്ക് പ്ലാസ്മ നല്കാന് കൊവിഡ് മുക്തി നേടിയ 22 പേരാണ് ഇന്നലെ മഞ്ചേരി മെഡിക്കല് കോളേജില് എത്തിയത്. ഇനിയും ഇരുന്നൂറോളം പേര് പ്ലാസ്മ നല്കാന് തയ്യാറാണ്. ആലപ്പുഴ മെഡിക്കല് കോളേജില് ഗുരുതരാവസ്ഥയിലുള്ള രോഗിക്ക് കഴിഞ്ഞ ദിവസം മഞ്ചേരിയില് നിന്നും പ്ലാസ്മ എത്തിച്ചു നല്കി.
