മാനന്തവാടി: വയനാട് പുല്പ്പള്ളി സര്വീസ് സഹകരണ ബാങ്കിലെ വായ്പ തട്ടിപ്പ് കേസില് റിമാന്ഡിലായ കെ കെ എബ്രഹാം രാജിവച്ചു. കെ പി സി സി ജനറല് സെക്രട്ടറി സ്ഥാനത്ത് നിന്നാണ് കെ കെ എബ്രഹാം രാജി വച്ചത്. ജയിലില് നിന്നാണ് കെ പി സി സി പ്രസിഡണ്ടിന് രാജി കത്തയച്ചത്. നിരപരാധിത്വം തെളിയിക്കും വരെ മാറി നില്ക്കുന്നുവെന്നാണ് കെ പി സി സി അധ്യക്ഷന് കെ സുധാകരന് അയച്ച കത്തില് കെ കെ എബ്രഹാം പറയുന്നത്. പുല്പ്പള്ളി സര്വീസ് സഹകരണ ബാങ്കിലെ വായ്പ തട്ടിപ്പുമായി ബന്ധപ്പെട്ട് വിജിലന്സ് അന്വേഷണത്തിലാണ് എബ്രഹാം ജയിലിലായത്.
വായ്പ തട്ടിപ്പിനിരയായ രാജേന്ദ്രന്റെ ആത്മഹത്യയെ തുടര്ന്നുണ്ടായ പ്രതിഷേധമാണ് വിജിലന്സ് നടപടികള് വേഗത്തിലാക്കിയത്. കെ പി സി സി ജനറല് സെക്രട്ടറിയും മുന് ബാങ്ക് ഭരണ സമിതി പ്രസിഡന്റുമായ കെ കെ എബ്രഹാം ഉള്പ്പെടെ 10 പേരാണ് പ്രതി പട്ടികയില് ഉള്ളത്. ചൊവ്വാഴ്ച്ചയാണ് വായ്പാ തട്ടിപ്പ് കേസില് കര്ഷകനായ രജേന്ദ്രന് വിഷം കഴിച്ച് ആത്മഹത്യ ചെയ്തത്. ഇതിനെ തുടര്ന്ന് എബ്രഹാം ഉള്പ്പടെയുള്ളവര്ക്കെതിരെ വലിയ പ്രതിഷേധമാണ് ഉയര്ന്നത്. എബ്രഹാമിനെതിരെ നടപടിയെടുക്കണം എന്നായിരുന്നു പ്രതിഷേധക്കാരുടെ ആവശ്യം.
