കൊച്ചി: യാത്രക്കാരുടെ ആവശ്യം പരിഗണിച്ച്‌ എല്ലാ സ്റ്റേഷനുകളില്‍ നിന്നും സൈക്കിളുമായി മെട്രോയില്‍ കയറാന്‍ അനുമതി നല്‍കി കൊച്ചി മെട്രോ റെയില്‍ ലിമിറ്റഡ്. നഗരത്തിലെ സൈക്കിള്‍ ഉപയോക്താക്കളുടെ എണ്ണം വര്‍ധിച്ചതോടെയാണ് ഈ മാസം 17 മുതല്‍ തെരഞ്ഞെടുക്കപ്പെട്ട ആറ് സ്റ്റേഷനുകള്‍ വഴി മെട്രോയില്‍ സൈക്കിള്‍ കൊണ്ടുപോകാന്‍ അനുവാദം നല്‍കിയത്.
ആദ്യഘട്ടമെന്ന നിലയില്‍ ചങ്ങമ്പുഴ പാര്‍ക്ക്, പാലാരിവട്ടം, ടൗണ്‍ ഹാള്‍, എറണാകുളം സൗത്ത്, മഹാരാജാസ് കോളജ്, എളംകുളം സ്‌റ്റേഷനുകളിലായിരുന്നു സൗകര്യം. 22 വരെയുള്ള കണക്കുകള്‍ പ്രകാരം 67 യാത്രക്കാരാണ് സൗജന്യ സേവനം ഉപയോഗപ്പെടുത്തിയത്. പ്രതിദിനം ശരാശരി 15,000 യാത്രക്കാരാണ് നിലവില്‍ കൊച്ചി മെട്രോയില്‍ യാത്ര ചെയ്യുന്നത്.
സേവനം വ്യാപിപ്പിക്കുന്നതിെന്‍റ ഭാഗമായി സൈക്കിളുകളുടെ പ്രവേശനത്തിന് പ്രത്യേക മാര്‍ഗനിര്‍ദേശവും കെ.എം.ആര്‍.എല്‍ പുറത്തിറക്കിയിട്ടുണ്ട്. ഒരു ട്രെയിനില്‍ നാല് സൈക്കിള്‍ മാത്രമാണ് അനുവദിക്കുക. അവശിഷ്ടങ്ങള്‍, ഗ്രീസ് ആധിക്യം, അഴുക്ക്, മൂര്‍ച്ചയുള്ള വസ്തുക്കള്‍ എന്നിവ ഇല്ലാതെ വേണം സൈക്കിള്‍ കയറ്റാന്‍. ഏതെങ്കിലും തരത്തിലുള്ള മോട്ടോര്‍ ഉപയോഗിച്ച്‌ പ്രവര്‍ത്തിക്കുന്നതോ പരിശീലന ചക്രങ്ങള്‍ ഘടിപ്പിച്ചതോ ആയ സൈക്കിളുകള്‍, രണ്ടിലധികം ആളുകള്‍ക്ക് ഇരുന്ന് ചവിട്ടി സഞ്ചരിക്കാന്‍ കഴിയുന്നത് എന്നിവ അനുവദിക്കില്ല.
മടക്കിവെക്കുന്നതോ അഴിച്ചുമാറ്റാന്‍ പറ്റുന്നതോ ബാഗുകള്‍ വഹിക്കുന്നതോ ആയ സൈക്കിളുകളെ ലഗേജ് ഇനങ്ങളായി കണക്കാക്കും. സ്റ്റേഷന് പരിസരം, ഇടനാഴികള്‍, സ്റ്റേഷന് കെട്ടിടങ്ങളെ ബന്ധിപ്പിക്കുന്ന പാലം, പ്ലാറ്റ്‌ഫോം തുടങ്ങിയ ഇടങ്ങളില്‍ സൈക്കിള്‍ ഓടിക്കുന്നതിനും നിരോധനമുണ്ട്.
സൈക്കിള്‍ പ്രവേശനവുമായി ബന്ധപ്പെട്ട് പൊതുജനങ്ങളില്‍നിന്ന് വലിയ പ്രതികരണമാണ് ലഭിച്ചതെന്നും ഞായറാഴ്ച മുതല്‍ എല്ലാ മെട്രോ സ്‌റ്റേഷനുകളില്‍നിന്നും സൈക്കിള്‍ പ്രവേശനം അനുവദിക്കുമെന്നും കെ.എം.ആര്‍.എല്‍ എം.ഡി അല്‍കേഷ്കുമാര്‍ ശര്‍മ പറഞ്ഞു.
