എറണാകുളം : കളമശ്ശേരി ഗവ. മെഡിക്കല് കോളജ് ആശുപത്രിയില് കോവിഡ് ബാധിതര് മരിച്ച സംഭവത്തില് വീഴ്ചയില്ലെന്ന് ചൂണ്ടിക്കാട്ടി ബന്ധുക്കള്ക്ക് നല്കിയ നോട്ടീസ് തിരികെ ചോദിച്ച് പോലീസ്. മരണത്തില് അനാസ്ഥ ചൂണ്ടിക്കാട്ടി പരാതി നല്കിയ മരിച്ച കുന്നുകര സ്വദേശിനി ജമീലയുടെ ബന്ധുക്കള്ക്ക് നല്കിയ നോട്ടീസാണ് പോലീസ് മടക്കിച്ചോദിച്ചത്.
അനാസ്ഥമൂലം കോവിഡ് ബാധിതന് മരിക്കാനിടയായെന്ന വെളിപ്പെടുത്തലിന്റെ അടിസ്ഥാനത്തിലാണ് കൊച്ചി സ്വദേശി ഹാരിസ്, ആലുവ സ്വദേശി ബൈഹക്കി, കുന്നുകര സ്വദേശിനി ജമീല എന്നിവരുടെ ബന്ധുക്കള് കളമശ്ശേരി പോലീസില് പരാതി നല്കിയത്. ഇതേതുടര്ന്നുള്ള അന്വേഷണത്തിലാണ് മെഡിക്കല് കോളജ് അധികൃതരുടെ ഭാഗത്ത് വീഴ്ചയില്ലെന്ന് കണ്ടെത്തിയതായി വ്യക്തമാക്കി പരാതിക്കാര്ക്ക് പോലീസ് നോട്ടീസ് നല്കിയത്.
ഹാരിസിന്റെ ബന്ധു അന്വറിനെ സ്റ്റേഷനില് വിളിച്ചുവരുത്തി പോലീസ് വ്യാഴാഴ്ച രാവിലെ നോട്ടീസ് കൈമാറി. എന്നാല്, ജമീലയുടെ ബന്ധുവിന്റെ വീട്ടില് വ്യാഴാഴ്ച വൈകീട്ട് മൂന്നോടെ എത്തിയാണ് നോട്ടീസ് നല്കിയത്. ആറുമണിയോടെ വീണ്ടും പോലീസ് വീട്ടിലെത്തി തിരികെ ചോദിക്കുകയായിരുന്നു. നല്കിയ നോട്ടീസില് അഡ്രസില് തെറ്റുണ്ടെന്ന് പറഞ്ഞാണ് തിരികെ ചോദിച്ചത്. തങ്ങള്ക്ക് ലഭിച്ച നോട്ടീസിലെ അഡ്രസില് തെറ്റില്ലെന്നാണ് കുടുംബം പറയുന്നത്.
അതേസമയം, ബൈഹക്കിയുടെ ബന്ധുവിനെ വിളിച്ച് അറിയിച്ചിരുന്നെങ്കിലും നോട്ടീസ് കൈമാറിയില്ല. നോട്ടീസ് ലഭിച്ച ബന്ധുക്കള് നിയമനടപടിക്ക് ഒരുങ്ങുകയാണ്. ഹാരിസിന്റെ കുടുംബം ദേശീയ മനുഷ്യാവകാശ കമ്മീഷന് പരാതി നല്കും.
