ന്യൂഡൽഹി : ക്യാപ്റ്റൻസി വിവാദത്തിൽ വിരാട് കോലിക്കു പിന്തുണയുമായി ബാല്യകാല പരിശീലകൻ രാജ്കുമാർ ശർമ. ഒന്നിനോടും അമിതമായ ആർത്തി വെച്ചുപുലർത്തുന്ന ആളല്ല കോലിയെന്ന് അഭിപ്രായപ്പെട്ട ശർമ, കോലി ഫീൽഡിൽ 100 ശതമാനം ആത്മസമർപ്പണം നടത്തുമെന്നും പറഞ്ഞു. വിവാദങ്ങളുമായി ബന്ധപ്പെട്ട വിഷയങ്ങൾ കോലിയുടെ മനസ്സിന്റെ അടിത്തട്ടിലുണ്ടാകും. പക്ഷേ ഗ്രൗണ്ടിൽ ഇറങ്ങിയാൽപ്പിന്നെ ഇക്കാര്യങ്ങളൊന്നും കോലിയിൽ സ്വാധീനം ചെലുത്തുമെന്നു കരുതുന്നില്ല. ഒന്നിനോടും അമിതമായ ആർത്തിയുള്ള ആളല്ല കോലി. ഫീൽഡിൽ കോലി 100 ശതമാനവും ആത്മസമർപണം നടത്തും എന്ന് എനിക്ക് ഉറപ്പാണ്.
ഇത്തരത്തിലുള്ള വിവാദങ്ങൾ ഏതൊരു താരത്തിനും മാനസിക ബുദ്ധിമുട്ടുണ്ടാക്കും എന്നതു തീർച്ഛയാണ്. പക്ഷേ പ്രശ്നങ്ങൾക്കു പരിഹാരം കാണാൻ ബിസിസിഐ ഇടപെടുമെന്നാണു ഞാൻ കരുതുന്നത് – അദ്ദേഹത്തിന്റെ വാക്കുകൾ. ഈ മാസം 26നു സെഞ്ചൂറിയനിലെ ആദ്യ ടെസ്റ്റോടെയാണ് ഇന്ത്യയുടെ ദക്ഷിണാഫ്രിക്കൻ പര്യടനത്തിനു തുടക്കമാകുക.
