കോന്നി : രാത്രി സമയങ്ങളില് വൈദ്യുതി പോയാല് പരാതി പറയാന് കോന്നി കെ.എസ്.ഇ.ബി ഓഫീസില് വിളിച്ചാല് ജീവനക്കാര് ഫോണ് എടുക്കുകയോ മറുപടി പറയുകയോ ചെയ്യാറില്ലെന്ന് വ്യാപക പരാതി. തന്നെയുമല്ല പൊതുജനങ്ങള്ക്ക് ബന്ധപ്പെടാനുള്ള മൊബൈല് ഫോണ് സ്വിച്ച് ഓഫ് ചെയ്തു വെക്കുന്നതായും ജനങ്ങള് പരാതി പറയുന്നു. കോന്നി ടൌണില് ഉള്പ്പെടെ വൈദ്യുതി പോയാലും ഇതാണ് അവസ്ഥ. കാറ്റും മഴയും ഇല്ലാത്തപ്പോള് പോലും വൈദ്യുതി നിലയ്ക്കുന്നത് പതിവായി മാറുന്നുണ്ട്. മണിക്കൂറുകളോളം വൈദ്യുതി ലഭിക്കാത്തത് വ്യാപാരികളെ ഏറെ ബുദ്ധിമുട്ടിലാക്കുന്നു.
ഫ്രീസറില് സൂക്ഷിക്കുന്ന പാലും മറ്റ് ഉത്പന്നങ്ങളും വൈദ്യുതി ഇല്ലാതെ വരുന്നതോടെ നശിച്ചു പോവുകയും വലിയ നഷ്ടം സംഭവിക്കുകയും ചെയ്യുന്നുണ്ട്. പലയിടത്തും സ്ട്രീറ്റ് ലൈറ്റുകള് കത്താതെ വരുന്നത് ഇഴജന്തുക്കളുടെ ശല്യവും വര്ധിപ്പിക്കുന്നു. ഓഫീസ് നമ്പരില് വിളിച്ച് കിട്ടാതെ വരുമ്പോള് കോന്നി കെ.എസ്.ഇ.ബി യിലെ ഉന്നത ഉദ്യോഗസ്ഥരെ വിളിച്ചാലും പലപ്പോഴും മറുപടി ലഭിക്കുന്നില്ലെന്നും പരാതി ഉയരുന്നുണ്ട്. കോന്നിയില് ജനങ്ങള് തിങ്ങിപ്പാര്ക്കുന്ന സ്ഥലത്ത് പോലും കാറ്റോ മഴയോ ഇല്ലാതെ വൈദ്യുതി ബന്ധം നിലയ്ക്കുന്നത് പതിവാകുന്നുണ്ട്. ഇതിനെതിരെ വലിയ പ്രതിഷേധത്തിലാണ് പൊതു ജനങ്ങള്.
