യു.കെ : യു.കെയിലെ ടൗൺ കൗൺസിലര് പദവിയിലേക്ക് പത്തനംതിട്ട സ്വദേശിയെ തെരഞ്ഞടുത്തു. കോന്നി സ്വദേശി ആശിഷ് ജോസഫ് മാത്യുവിനെയാണ് യു.കെയിലെ നീഡ്ഹാം മാർക്കറ്റ് ടൗൺ കൗൺസിലറായി തെരഞ്ഞടുത്തത്. സഫോക്ക് കൗണ്ടിക്ക് കീഴിലുള്ള കൗൺസിലിലെ ഒഴിവിലേക്ക് നടന്ന ‘കോ-ഓപ്ഷൻ’ നടപടി ക്രമങ്ങളിലൂടെയാണ് ആശിഷ് കൗൺസിലർ പദവിയിലെത്തിയത്. നിലവിൽ സഫോക്കിലെ നീഡ്ഹാം മാർക്കറ്റിലാണ് ഇദ്ദേഹം താമസിക്കുന്നത്. പ്രാദേശിക സമൂഹത്തിന്റെ ആവശ്യങ്ങൾ മനസിലാക്കി ജനക്ഷേമത്തിനായി പ്രവർത്തിക്കുകയാണ് തന്റെ പ്രധാന ലക്ഷ്യമെന്ന് ആശിഷ് പറഞ്ഞു.
തനിക്ക് ലഭിച്ച ഉത്തരവാദിത്തം വളരെ ഗൗരവത്തോടെയാണ് കാണുന്നതെന്നും ജനങ്ങളുടെ അഭിപ്രായങ്ങളും നാടിന്റെ വികസന ആവശ്യങ്ങളും കൗൺസിലിന്റെ ശ്രദ്ധയിലെത്തിക്കാൻ സജീവമായി മുന്നിലുണ്ടാകുമെന്നും അദ്ദേഹം വ്യക്തമാക്കി. ബ്രിട്ടനിലെ തദ്ദേശ സ്വയംഭരണ സംവിധാനത്തിലേക്ക് കോന്നിയിൽ നിന്നുള്ള യുവാവ് തെരഞ്ഞെടുക്കപ്പെട്ടത് പ്രവാസി മലയാളി സമൂഹത്തിനും ജന്മനാടിനും ഏറെ അഭിമാനകരമായ നേട്ടമാണ്. കോന്നി ജെറുസലേം മാർത്തോമാ ഇടവക അംഗമാണ് ആശിഷ് ജോസഫ് മാത്യു.
