കൊച്ചി: കാട്ടാക്കടയില്‍ പെണ്‍കുട്ടിയുടെ മുന്നില്‍വെച്ച് അച്ഛനെ മര്‍ദിച്ച കേസില്‍ ജീവനക്കാര്‍ക്കെതിരെ സ്ത്രീത്വത്തെ അപമാനിച്ചതടക്കമുള്ള വകുപ്പുകള്‍ ചേര്‍ത്ത് കേസെടുത്തതായി കെ.എസ്‌.ആര്‍.ടി.സി ഹൈക്കോടതിയില്‍ റിപ്പോര്‍ട്ട് നല്‍കി. സസ്പെന്‍ഷന്‍ ഉള്‍പ്പെടെ സ്വീകരിച്ച നടപടികള്‍ വ്യക്തമാക്കിയാണ് റിപ്പോര്‍ട്ട്. നാല് പ്രതികള്‍ക്കെതിരെയുള്ള എഫ്‌ഐആറിന്റെ പകര്‍പ്പ്, പെണ്‍കുട്ടിയുടെയും അച്ഛന്റെയും സുഹൃത്തിന്റെയും മൊഴിപ്പകര്‍പ്പ്, നാലുപേരുടെയും സസ്പെന്‍ഷന്‍ ഓര്‍ഡര്‍ എന്നിവ ഉള്‍പ്പെടുന്ന റിപ്പോര്‍ട്ടാണ് ജസ്റ്റിസ് ദേവന്‍ രാമചന്ദ്രന് കൈമാറിയത്.
ഒളിവിലായതിനാലാണ് പ്രതികളെ അറസ്റ്റ് ചെയ്യാനാകാത്തതെന്ന് കോടതിയുടെ ചോദ്യത്തിന് മറുപടിയായി സര്‍ക്കാര്‍ വിശദീകരിച്ചു. മര്‍ദനദൃശ്യം പകര്‍ത്തിയയാള്‍ക്ക് സുരക്ഷാ ഭീഷണിയുള്ളതിനാല്‍ അയാളെ മറ്റൊരു യൂണിറ്റില്‍ നിയമിച്ചു. മര്‍ദനമേറ്റയാളെയും മകളെയും ഫോണില്‍ വിളിച്ച്‌ കെഎസ്‌ആര്‍ടിസി എംഡി ക്ഷമ ചോദിച്ചിട്ടുണ്ട്. പ്രതികള്‍ക്കെതിരെ കര്‍ശന നടപടിയെടുക്കുമെന്ന് ഉറപ്പുനല്‍കി.
