കുളത്തൂപ്പുഴ : കുളത്തൂപ്പുഴ ഗ്രാമപഞ്ചായത്തിലെ മൃഗാശുപത്രിയില്‍ ഡോക്ടറുടെ സേവനമില്ലാതായിട്ട് നാളുകളേറെ. ചികിത്സ ലഭിക്കാതെ വളര്‍ത്തുമൃഗങ്ങള്‍ ചാവുന്നു. കഴിഞ്ഞദിവസം കടമാന്‍കോട് ശാലിനി മന്ദിരത്തില്‍ ശ്യാം കുമാറിന്‍റെ ഗര്‍ഭിണി പശുവിന് യഥാസമയം ചികിത്സ ലഭിക്കാതെ കിടാവ് ചത്തതാണ് അവസാനത്തെ സംഭവം. പ്രദേശവാസികളില്‍ ചിലര്‍ ഇടപെട്ട് കടയ്ക്കലില്‍ നിന്ന് മൃഗഡോക്ടറെ എത്തിച്ച്‌ കുട്ടിയെ പുറത്തെടുത്തെങ്കിലും കിടാവ് ചത്തതായി ഡോക്ടര്‍ പറഞ്ഞു.
കല്ലുവെട്ടാംകുഴി, വില്ലുമല, ഡാലി, പൂമ്പാറ തുടങ്ങിയ പ്രദേശങ്ങളില്‍ കര്‍ഷകരുടെ വളര്‍ത്തുമൃഗങ്ങള്‍ ചികിത്സ കിട്ടാതെ ചത്തതായി നാട്ടുകാര്‍ വ്യക്തമാക്കുന്നു. മൃഗഡോക്ടറുടെ സേവനം ലഭ്യമാക്കണമെന്നാവശ്യപ്പെട്ട് നിരവധി തവണ പരാതി നല്‍കിയിട്ടും നടപടി ഉണ്ടായിട്ടില്ല. നിയമസഭ തെരഞ്ഞെടുപ്പിനുമുമ്പ് കുളത്തൂപ്പുഴ മൃഗാശുപത്രിയെ പോളിക്ലിനിക്കായി ഉയര്‍ത്തിയെന്നുള്ള സര്‍ക്കാര്‍ പ്രഖ്യാപനമുണ്ടായി. ഇരുപത്തിനാലുമണിക്കൂറും രണ്ട് ഡോക്ടറുടെ സേവനം ലഭ്യമാക്കുമെന്ന അധികൃതരുടെ ഉറപ്പുകള്‍ക്ക് മുന്നിലാണ് ക്ഷീര കര്‍ഷകരുടെ ഈ നിസ്സഹായാവസ്ഥ. ഗ്രാമപഞ്ചായത്തിന്‍റെ ഇടപെടലുകളില്ലാത്തതും കര്‍ഷകരുടെ ദുരിതം വര്‍ധിപ്പിക്കുന്നു.
