കോട്ടയം : കോട്ടയം ജില്ലയിലെ കൂട്ടിക്കല് പ്ലാപ്പള്ളി ഭാഗത്തുണ്ടായ ഉരുള്പൊട്ടലില് ഏഴ് പേരെ കാണാതായി. 3 വീടുകള് ഒലിച്ചുപോയി. പുലര്ച്ചെ മുതല് പെയ്യുന്ന ശക്തമായ മഴയെത്തുടര്ന്നാണ് ഉരുള്പൊട്ടലുണ്ടായത്. പൂഞ്ഞാര് തെക്കേക്കരയിലും മുണ്ടക്കയത്തുമൊക്കെ ഉരുള്പൊട്ടല് ഉണ്ടായെങ്കിലും അത് തീവ്രത കുറഞ്ഞവ ആയിരുന്നു. എന്നാല്, കൂട്ടിക്കലില് ഉണ്ടായത് ശക്തമായ ഉരുള്പൊട്ടലാണ്.
വിവിധയിടങ്ങളില് ഉരുള്പൊട്ടലുണ്ടായി മീനച്ചിലാറ്റിലേക്കും മണിമലയാറ്റിലേക്കും വെള്ളം ഇരച്ചെത്തിയാണ് ജില്ലയില് വെള്ളപ്പൊക്കമുണ്ടായത്. വെള്ളപ്പൊക്കത്തില് വീടുകളില് വെള്ളം കയറുകയും വാഹനങ്ങളും കോഴി ഫാമുകളും അടക്കമുള്ളവ ഒഴികിപ്പോവുകയും ചെയ്തു. ഇതിനകം നൂറോളം ദുരിതാശ്വാസ കാംപുകളാണ് ജില്ലയില് തുറന്നിരിക്കുന്നത്. കൂട്ടിക്കല് നഗരവും മുണ്ടക്കയം നഗരവും ഒറ്റപ്പെടുന്ന സാഹചര്യമാണ് ഉള്ളത്.
സംസ്ഥാനത്ത് വിവിധ ഭാഗങ്ങളില് മഴക്കെടുത്തി തുടരുകയാണ്. കോട്ടയം ജില്ലയിലാണ് ഏറെ കെടുതികള് റിപോര്ട്ട് ചെയ്യുന്നത്. കൂട്ടിക്കലില് രക്ഷാപ്രവര്ത്തനത്തിന് പോലിസിനെയും ഫയര് ഫോഴ്സിനെയും നിയോഗിച്ചു. ഒറ്റപെട്ട കുടുംബങ്ങളെ മാറ്റി താമസിപ്പിക്കും. ഈരാറ്റുപേട്ട-പാല റോഡില് വെള്ളം കയറിത്തുടങ്ങി. അരുവിത്തുറ പാലം മുങ്ങി. പനക്കപ്പാലത്ത് റോഡില് വെള്ളം കയറി. കോട്ടയം ജില്ലയിലെ മഴക്കെടുതിയില് പെട്ടു പോയവരെ രക്ഷിക്കാന് എയര് ലിഫ്റ്റിങ് ആവശ്യപ്പെട്ടിട്ടുണ്ടെന്ന് മന്ത്രി വി.എന് വാസവന്. കുടുങ്ങിക്കിടക്കുന്നവരെ ടോറസില് കൊണ്ടുവരാനുള്ള ശ്രമവും നടത്തുന്നുണ്ട്.
ചില പ്രദേശത്ത് ആളുകളെ മാറ്റിപ്പാര്പ്പിക്കുകയാണ്. സര്ക്കാര് സംവിധാനങ്ങള് ഒറ്റക്കെട്ടായി രംഗത്തുണ്ട്. ഈരാറ്റുപേട്ടയില് രക്ഷാപ്രവര്ത്തനത്തിനിടെ തഹസില്ദാര് ഒറ്റപ്പെട്ടു പോയി. ഇദ്ദേഹത്തെ രക്ഷിക്കാന് പോലിസും ഫയര് ഫോഴ്സും അങ്ങോട്ട് പൊയ്ക്കൊണ്ടിരിക്കുകയാണെന്നും മന്ത്രി പറഞ്ഞു. ഇവിടങ്ങളിലൊക്കെ താത്കാലിക ക്യാമ്പുകള് ആരംഭിച്ചിട്ടുണ്ട്. ആളുകളെ അവിടേക്ക് മാറ്റിയിട്ടുണ്ട്. പ്രതീക്ഷിക്കാത്ത ചില ഇടങ്ങളില് ഉരുള്പൊട്ടലുണ്ടായി. ഇവരെ രക്ഷപ്പെടുത്താനുള്ള ശ്രമങ്ങള് ആരംഭിച്ചിട്ടുണ്ട് എന്നും അദ്ദേഹം കൂട്ടിച്ചേര്ത്തു.
