കൊല്ലം: ശാസ്താംകോട്ടയില് മരം മുറിക്കുന്നതിനിടെ കഴുത്തില് കയര് കുരുങ്ങി തൊഴിലാളിക്ക് ദാരുണാന്ത്യം. മുതുപിലാക്കാട് സ്വദേശി കൃഷ്ണന്കുട്ടിയാണ് (കണ്ണന് 48) മരിച്ചത്. ഇന്നു രാവിലെ 11 മണിയോടെ ആഞ്ഞിലിമൂടാണു സംഭവം. മരം മുറിക്കുന്ന യന്ത്രവുമായാണു കണ്ണന് മരത്തില് കയറിയത്. യന്ത്രം താഴെ വീഴാതിരിക്കാനായി മരത്തില് കയറുമായി ബന്ധിച്ചിരുന്നു. ശിഖരങ്ങള് മുറിക്കുന്നതിനിടെ യന്ത്രം കയ്യില് നിന്നു വഴുതി താഴേക്കു പോയതോടെ അബദ്ധത്തില് കഴുത്തില് കയര് കുരുങ്ങുകയായിരുന്നെന്നു ദൃക്സാക്ഷികള് പറയുന്നു. നാട്ടുകാര് വിവരം അറിയിച്ചതിനെ തുടര്ന്നു ഫയര് ഫോഴ്സ് എത്തിയാണു മൃതദേഹം താഴെയിറക്കിയത്. മൃതദേഹം ശാസ്താംകോട്ട താലൂക്ക് ആശുപത്രി മോര്ച്ചറിയിലേക്കു മാറ്റി.
