തിരുവനന്തപുരം: സംസ്ഥാനത്തെ മദ്യ വില വർധന ഇന്ന് ചേരുന്ന മന്ത്രിസഭാ യോഗം പരിഗണിച്ചേക്കും. വില കൂട്ടുന്നതിനാണ് സാധ്യത. മദ്യകമ്പനികള്‍ ബിവറിജസ് കോര്‍പറേഷന് മദ്യം നല്‍കുമ്പോഴുള്ള വിറ്റുവരവ് നികുതി ഒഴിവാക്കാന്‍ തത്വത്തില്‍ ധാരണയായിട്ടുണ്ട്. ഇത് ഒഴിവാക്കുമ്പോള്‍ 175 കോടിയിലേറെ രൂപയുടെ വരുമാന നഷ്‌ടമാണ് കണക്കാക്കുന്നത്. ഈ നഷ്‌ടം നികത്തുന്നതിനാണ് വിലവര്‍ധന കൊണ്ടുവരാൻ ആലോചിക്കുന്നത്.
ചീഫ് സെക്രട്ടറി അധ്യക്ഷനായ സമിതി ഇക്കാര്യം പരിശോധിച്ച് നല്‍കിയ റിപ്പോര്‍ട്ട് മന്ത്രിസഭ പരിശോധിക്കും. സില്‍വര്‍ ലൈന്‍ പദ്ധതിക്കായി റവന്യൂ വകുപ്പില്‍ നിന്ന് നിയോഗിച്ച 205 ജീവനക്കാരെ തിരികെ വിളിക്കുന്നതടക്കമുള്ള വിഷയങ്ങളും അജണ്ടയിൽ ഇല്ലെങ്കിലും മന്ത്രിസഭാ യോഗത്തിന്റെ പരിഗണനയിൽ വന്നേക്കുമെന്നാണ് റിപ്പോർട്ടുകൾ.
