തിരുവനന്തപുരം : സംസ്ഥാനത്ത് ലോക്ഡൗണ് നീട്ടില്ല. ജൂണ് 17 മുതല് തദ്ദേശ സ്ഥാപനങ്ങളെ നാല് വിഭാഗങ്ങളായി തിരിച്ച് നിയന്ത്രണമേര്പ്പെടുത്തും. മുഖ്യമന്ത്രിയുടെ അധ്യക്ഷതയില് ചേര്ന്ന കോവിഡ് അവലോകന യോഗത്തിലാണ് തീരുമാനം.
പൊതുഗതാഗതം ഭാഗികമായി അനുവദിക്കും. ബാര്ബര് ഷോപ്പുകള്, വര്ക്ക്ഷോപ്പുകള് തുടങ്ങിയവ തുറന്നു പ്രവര്ത്തിക്കാന് അനുമതിയുണ്ടാവും. സമ്പൂര്ണമായ തുറന്നുകൊടുക്കല് ഉണ്ടാവില്ലെന്നാണ് വിവരം. ടി.പി.ആര് 30ന് മുകളിലുള്ള തദ്ദേശ സ്ഥാപനങ്ങളില് ട്രിപ്പിള് ലോക്ഡൗണും 20ന് മുകളിലുള്ള സ്ഥലങ്ങളില് സാധാരണ ലോക്ഡൗണും ഏര്പ്പെടുത്തിയേക്കും.
ലോക്ഡൗണ് പ്രഖ്യാപിച്ചതിന്റെ ഫലമായി സംസ്ഥാനത്ത് ടെസ്റ്റ് പോസിറ്റിവിറ്റി നിരക്കില് ഗണ്യമായ കുറവുണ്ടായിരുന്നു. എന്നാല് സംസ്ഥാന വ്യാപകമായി ടി.പി.ആര് കുറയുമ്പോഴും പല തദ്ദേശ സ്ഥാപനങ്ങളിലും ടി.പി.ആര് നിരക്ക് 35 ശതമാനത്തില് കൂടുതലാണ്. അതേസമയം ലോക്ക്ഡൗണ് നീട്ടുന്നത് ജനങ്ങളെ കൂടുതല് ദോഷകരമായി ബാധിക്കുമെന്ന വിലയിരുത്തലിലാണ് നിയന്ത്രണങ്ങള് ലഘൂകരിക്കാന് തീരുമാനിച്ചത്.
കഴിഞ്ഞ മൂന്നു ദിവസങ്ങളിലെ ശരാശരി ടെസ്റ്റ് പോസിറ്റിവിറ്റി നിരക്ക് 12.7 ശതമാനമാണ്. തിരുവനന്തപുരം, പാലക്കാട്, മലപ്പുറം ഒഴികെ ജില്ലകളില് ടി.പി.ആര് 15ലും താഴെയെത്തി. ആലപ്പുഴ, കോഴിക്കോട് ജില്ലകളില് പത്ത് ശതമാനത്തിലും താഴെയായി. കേസുകളുടെ എണ്ണം 20 ശതമാനം കുറഞ്ഞു. എന്നാല് 14 തദ്ദേശ സ്ഥാപന പരിധിയില് ടി.പി.ആര് 35 ശതമാനത്തിലും കൂടുതലാണ്. 37 തദ്ദേശ സ്ഥാപന പരിധിയില് 28 മുതല് 35 വരെയാണ്. 127 ഇടത്ത് 21നും 28നും ഇടയിലാണ് ടി.പി.ആര്.
