തിരുവനന്തപുരം : ലോക്ക്ഡൗണ്‍ കാലത്ത് സര്‍ക്കാര്‍ ജനങ്ങളെ പിഴിഞ്ഞുണ്ടാക്കിയത് 154 കോടി 42 ലക്ഷം. ഒക്ടോബര്‍ വരെ ആറ് ലക്ഷത്തിലധികം കേസുകളാണ് പോലീസ് രജിസ്റ്റര്‍ ചെയ്തിട്ടുള്ളത്. മാസ്ക് ധരിക്കാത്തതും, സാമൂഹിക അകലം പാലിക്കാത്തതും, നിയന്ത്രണം ലംഘിച്ച്‌ വാഹനങ്ങള്‍ നിരത്തിലിറക്കിയതുമടക്കമുള്ള ലംഘനങ്ങള്‍ക്കാണ് 154 കോടി 42 ലക്ഷത്തി 4700 രൂപ പോലീസ് പിടിച്ചെടുത്തത്.
പണിയും കൂലിയും ഇല്ലാതെ ജനങ്ങള്‍ നട്ടം തിരിയുന്നസമയാത്താണ് സര്‍ക്കാരിനു വേണ്ടി കിങ്കരന്മാരായ പോലിസുകാര്‍ ജനങ്ങളെ പിഴിഞ്ഞൂറ്റിയത്‌. ഇത്രയും പിഴ ചുമത്തിയതെന്നുള്ളത് സര്‍ക്കാരിന് തന്നെ വലിയ വിമര്‍ശനത്തിന് വഴിയൊരുക്കുന്നുണ്ട്. 611851 കേസുകളാണ് സംസ്ഥാനത്തൊട്ടാകെ രജിസ്റ്റര്‍ ചെയ്തത്. ഏറ്റവുമധികം കേസുകള്‍ തിരുവനന്തപുരം ജില്ലയിലാണ്, 1,86,790 കേസുകളാണ് ജില്ലയില്‍ രജിസ്റ്റര്‍ ചെയ്തിരിക്കുന്നത്. എറണാകുളം ജില്ലയിലാണ് ഏറ്റവുമധികം പിഴ ചുമത്തിയിരിക്കുന്നത്, 22,41,59,800 രൂപ ഇവിടെ നിന്ന് മാത്രം പോലീസിന് ലഭിച്ചിട്ടുണ്ട്. തിരുവനന്തപുരം ജില്ലയില്‍ 14,24,43,500 രൂപയും, മലപ്പുറത്ത് 13,90,21,500 രൂപയാണ് പിഴ ഇനത്തില്‍ പോലീസിനു ലഭിച്ചത്.
അതേസമയം, 133 കേസുകള്‍ രജിസ്റ്റര്‍ ചെയ്ത് റെയില്‍വേ പോലീസും 4,10100 രൂപ സര്‍ക്കാരിന്റെ ഖജനാവിനു സമ്മാനിച്ചിട്ടുണ്ട്. ജനങ്ങളെ അനാവശ്യമായി വേട്ടയാടുന്ന പോലീസ് നടപടിയാണ് ലോക് ഡൗണ്‍ കാലത്തേതെന്നും, പിഴകളില്‍ ഒട്ടുമിക്കതും അനാവശ്യമായിരുന്നുവെന്നും കണക്കുകള്‍ പുറത്തു വന്നതോടെ വെളിച്ചത്ത് വരുന്നത്‌.
