മുംബൈ: കോവിഡ് രോഗികളുടെ എണ്ണം അനുദിനം വര്‍ധിക്കുന്ന മഹാരാഷ്ട്രയില്‍ സ്ഥിതി അതീവ ഗുരുതരമാകുന്നു. മൊത്തം രോഗികളുടെ എണ്ണം 40,000 നുമേല്‍ ആയതോടെ സ്വകാര്യ ആശുപത്രികള്‍ സര്‍ക്കാര്‍ ഏറ്റെടുത്തു. മുംബൈയില്‍ മാത്രം രോഗികളുടെ എണ്ണം 25,000 കടന്നു.
സ്വകാര്യ ആശുപത്രികളിലെ 80 ശതമാനം കിടക്കകളും സര്‍ക്കാര്‍ ഏറ്റെടുത്തു. ഓഗസ്റ്റ് 31 വരെ ഈ ആശുപത്രികള്‍ സര്‍ക്കാര്‍ നിയന്ത്രണത്തിലായിരിക്കും. ഇവിടുത്തെ ചികില്‍സയുടെ ചെലവും രോഗികള്‍ക്ക് പരമാവധി എത്ര രൂപയുടെ ബില്‍ നല്‍കാനാകുമെന്നതും സര്‍ക്കാരാണ് തീരുമാനിക്കുക. തുടര്‍ച്ചയായ അഞ്ചാം ദിനവും സംസ്ഥാനത്ത് കോവിഡ് കേസുകളുടെ എണ്ണം രണ്ടായിരത്തിനു മുകളിലാണ്. കഴിഞ്ഞ 24 മണിക്കൂറിനിടെ 2,345 പുതിയ കേസുകള്‍ റിപ്പോര്‍ട്ടു ചെയ്തു.
