പാലക്കാട് : മഹിളാ മോര്‍ച്ച പാലക്കാട് മണ്ഡലം ട്രഷറര്‍ ശരണ്യ (27) യുടെ മരണത്തില്‍ ദുരൂഹത. ശരണ്യയെ ഇന്നലെ വൈകിട്ട് അഞ്ചോടെ ആത്മഹത്യ ചെയ്ത നിലയില്‍ കണ്ടെത്തുകയായിരുന്നു. വീടിനുള്ളില്‍ തൂങ്ങിയ നിലയില്‍ കണ്ട ശരണ്യയെ ഉടന്‍ തന്നെ വീട്ടുകാര്‍ പാലക്കാട് ജില്ലാ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. ആത്മഹത്യാ കുറിപ്പില്‍ പ്രാദേശിക ബിജെപി നേതാവിന്റെ പേര് കണ്ടെത്തി.
ബിജെപി ബൂത്ത് പ്രസിഡന്റ് പ്രജീവിന്റെ പേരാണ് ആത്മഹത്യാ കുറിപ്പില്‍ ഉണ്ടായിരുന്നത്. ശരണ്യയുടെ ആത്മഹത്യയ്ക്ക് പിന്നില്‍ പ്രജീവാണെന്നാണ് കുടുംബത്തിന്റെയും ആരോപണം. ആത്മഹത്യാ കുറിപ്പില്‍ തന്നെ പ്രജീവ് ഉപയോഗപ്പെടുത്തിയെന്ന് ശരണ്യ എഴുതി വച്ചിട്ടുണ്ട്. ബിജെപി നേതൃത്വത്തിന് ഇക്കാര്യം വ്യക്തമാക്കി പരാതി നല്‍കിയിട്ടുണ്ടെന്നും ഉചിത നടപടി ഉടന്‍ പ്രതീക്ഷിക്കുന്നതായും ശരണ്യയുടെ കുടുംബം പറഞ്ഞു. ശരണ്യയുടെ അച്ഛന്‍ : രാജന്‍, അമ്മ : ശശികല (തങ്കം), ഭര്‍ത്താവ് : രമേഷ്, മക്കള്‍ : രാംചരണ്‍, റിയശ്രീ.
