പത്തനംതിട്ട : വിദ്യാലയങ്ങളുമായി ബന്ധമുള്ള എല്ലാ ജീവനക്കാരും കോവിഡ് വാക്സിന് എടുത്തെന്ന് ഉറപ്പുവരുത്തണമെന്ന് ജില്ലാ കളക്ടര്‍ ഡോ.ദിവ്യ എസ് അയ്യര്‍ പറഞ്ഞു. പത്തനംതിട്ട ജില്ലാ ദുരന്ത നിവാരണ അതോറിറ്റി (ഡിഡിഎംഎ) യോഗത്തിലാണ് കളക്ടര്‍ ഇക്കാര്യം പറഞ്ഞത്. അധ്യാപകര്‍, അനധ്യാപക ജീവനക്കാരെ കൂടാതെ കാന്റീന്‍ ജീവനക്കാര്‍, സ്‌കൂള്‍ വാഹനങ്ങളിലെ ഡ്രൈവര്‍മാര്‍, മറ്റ് ജീവനക്കാര്‍, താത്കാലിക ജീവനക്കാര്‍ തുടങ്ങി എല്ലാവരും വാക്സിന് സ്വീകരിക്കണം.
അതത് വിദ്യാലയങ്ങള്‍ തങ്ങളുടെ വിദ്യാലയങ്ങളിലെ വാക്സിന് സ്വീകരിച്ചവരും അല്ലാത്തവരുമായ മുഴുവന്‍ ജീവനക്കാരുടെയും കണക്കുകള്‍ അതത് ഹെല്‍ത്ത് സെന്ററുകളില്‍ സമര്‍പ്പിക്കുകയും ഡി.ഡി എജ്യുക്കേഷന്‍ ഇവ പരിശോധിച്ച് ഉറപ്പുവരുത്തുകയും ചെയ്യേണ്ടതാണ്. പത്തനംതിട്ട ജില്ലയിലെ മുഴുവന്‍ ആളുകളേയും വാക്‌സിനേഷന്റെ ഭാഗമാക്കിതീര്‍ക്കുക എന്ന ലക്ഷ്യത്തോടെ അങ്കണവാടി വര്‍ക്കര്‍മാര്‍, കുടുംബശ്രീ പ്രവര്‍ത്തകര്‍ തുടങ്ങിയവരുടെ സഹായത്തോടെ എല്ലാ തദ്ദേശ സ്ഥാപനങ്ങളും ജനപ്രതിനിധികളുടെ നേതൃത്വത്തില്‍ അതത് തദ്ദേശ സ്ഥാപനങ്ങളിലെ വാക്സിന് സ്വീകരിക്കാനുള്ളവരുടെ വിവരശേഖരണം ആരംഭിക്കും. സമ്പൂര്‍ണ്ണ വാക്‌സിനേഷന്‍ ഈ മാസത്തോടെ പൂര്‍ത്തിയാക്കാനാണ് ലക്ഷ്യമിടുന്നതെന്നും കളക്ടര്‍ പറഞ്ഞു.
ദുരന്തനിവാരണ വിഭാഗം ഡെപ്യൂട്ടി കളക്ടര്‍ ടി.ജി ഗോപകുമാര്‍, ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ.എ.എല്‍ ഷീജ, എന്‍.എച്ച്.എം ഡി.പി.എം ഡോ.ശ്രീകുമാര്‍, പഞ്ചായത്ത് ഡെപ്യുട്ടി ഡയറക്ടര്‍ കെ.ആര്‍ സുമേഷ്, ഡെപ്യൂട്ടി ഡിഎംഒ ഡോ.സി.എസ് നന്ദിനി, മറ്റ് വകുപ്പ് ഉദ്യോഗസ്ഥര്‍ എന്നിവര്‍ പങ്കെടുത്തു.
