തിരുവനന്തപുരം: പ്രതിപക്ഷനേതാവ് വി.ഡി.സതീശന് നയിക്കുന്ന മലയോര സമര പ്രചരണയാത്ര നടത്തുവാന് തീരുമാനിച്ചതായി യു.ഡി.എഫ് കണ്വീനര് എം.എം. ഹസന് വാര്ത്താസമ്മേളനത്തില് അറിയിച്ചു. ജനുവരി 27 മുതല് ഫെബ്രുവരി അഞ്ച് വരെയുള്ള മലയോര സമരപ്രചാരണ യാത്രയില് 19 സ്ഥലങ്ങളില് വമ്പിച്ച കര്ഷക സമ്മേളനങ്ങള് സംഘടിപ്പിക്കുമെന്നും അദ്ദേഹം പറഞ്ഞു. വനം നിയമഭേദഗതി ബില് പിന്വലിക്കുക, വന്യമൃഗങ്ങളുടെ അക്രമത്തില്നിന്ന് മലയോര കര്ഷകരേയും ജനങ്ങളേയും രക്ഷിക്കുക, കാര്ഷിക മേഖലയിലെ തകര്ച്ചക്ക് പരിഹാരമുണ്ടാക്കുക, ബഫര് സോണ് വിഷയത്തില് കേന്ദ്രസര്ക്കാര് ഇടപെടുക എന്നീ ആവശ്യങ്ങള് ഉന്നയിച്ചുകൊണ്ടാണ് പ്രചരണയാത്ര സംഘടിപ്പിക്കുന്നത്.
യു.ഡി.എഫിന്റെ പ്രമുഖ നേതാക്കളായ കെ. സുധാകരന് എം.പി, പി.കെ. കുഞ്ഞാലികുട്ടി, പി.ജെ. ജോസഫ്, രമേശ് ചെന്നിത്തല, സി.പി. ജോണ്, ഷിബു ബേബി ജോണ്, അനൂപ് ജേക്കബ്, ജി. ദേവരാജന്, മാണി സി. കാപ്പന്, അഡ്വ.രാജന് ബാബു, രാജേന്ദ്രന് വെള്ളപ്പാലത്ത് തുടങ്ങിയവര് യാത്രയില് പങ്കെടുക്കും. ജനുവരി 27 ന് കണ്ണൂരിലെ ഇരിക്കൂര് മണ്ഡലത്തിലെ ഉളിക്കലില് നിന്ന് ആരംഭിച്ച് ഫെബ്രുവരി അഞ്ചിന് തിരുവനന്തപുരത്ത് പാറശ്ശാല മണ്ഡലത്തിലെ അമ്പൂരിയിലാണ് യാത്ര സമാപിക്കുന്നത്.
