മലപ്പുറം: വളര്‍ത്തുനായയെ സ്കൂട്ടറില്‍ കെട്ടിവലിച്ച്‌ ഉടമയുടെ കൊടുംക്രൂരത. നായയെ മൂന്ന് കിലോമീറ്ററോളം സ്കൂട്ടറിന്റെ പിന്നില്‍ കെട്ടിവലിച്ചു. ശനിയാഴ്ച വൈകുന്നേരം നാലോടെ എടക്കരയില്‍ ആയിരുന്നു സംഭവം.
വീട്ടില്‍ ശല്യമായ നായയെ ഉപേക്ഷിക്കാന്‍ കൊണ്ടുപോയതാണെന്നാണ് ഉടമയുടെ വിശദീകരണം. ചെരിപ്പ് ഉള്‍പ്പെടെ കടിച്ചുമുറിക്കുകയാണെന്നും വീട്ടില്‍ നായ ശല്യമായി മാറിയെന്നും ഇയാള്‍ പറയുന്നു. നായയെ സ്കൂട്ടറില്‍ കെട്ടിയ ശേഷം തുടക്കത്തില്‍ വേഗം കുറച്ചാണ് ഇയാള്‍ സഞ്ചരിച്ചത്. സ്കൂട്ടറിന്റെ വേഗത്തില്‍ കിലോമീറ്ററുകളോളം നായ പിന്നാലെ ഓടി. കാഴ്ച കണ്ട നാട്ടുകാര്‍ വിലക്കിയപ്പോള്‍ ഇയാള്‍ സ്കൂട്ടറിന് വേഗം കൂട്ടി ഓടിച്ചുപോയി. ഈ സമയം വീണുപോയ നായയെ കെട്ടിവലിച്ചു. മൃഗസ്നേഹികളുടെ പരാതിയില്‍ പോലീസ് അന്വേഷണം ആരംഭിച്ചിട്ടുണ്ട്.
