തിരുവനന്തപുരം: തിരുവനന്തപുരം പാലോട് പെരിങ്ങമ്മല താന്നിമൂടില് കെട്ടിടത്തിന് മുകളില് നിന്നും യുവാവ് വീണ് മരിച്ചു. സംഭവം കൊലപാതകമാണെന്ന് പോലീസിന് സംശയമുണ്ട്. മൂന്ന് പേരെ പാലോട് പോലീസ് കസ്റ്റഡിയില് എടുത്ത് ചോദ്യംചെയ്യുകയാണ്. താന്നിമൂട് സ്വദേശി സുഭാഷ് കുമാര് (42) ആണ് മരിച്ചത്. ഇന്നലെ രാത്രി 11 മണിയോടെയായിരുന്നു അപകടം. പെരിങ്ങമ്മല ജില്ലാ കൃഷിത്തോട്ടത്തിലെ ജീവനക്കാരനാണ് സുഭാഷ്. താന്നിമൂട് ജംഗ്ഷനിലെ പഴയ ഇരുനില വീട്ടില് വാടകയ്ക്കായിരുന്നു താമസം. സുഹൃത്തുക്കള് സ്ഥിരമായി ഇവിടെ വന്ന് മദ്യപിക്കാറുണ്ടായിരുന്നു.
ഇന്നലെയും പതിവ് പോലെ സുഭാഷും സുഹൃത്തുകളും മദ്യപിച്ചിരുന്നുവെന്ന് പോലീസ് പറയുന്നു. വീടിന്റെ അകത്താണ് ഇവര് മദ്യപിച്ചിരുന്നത്. അതിനിടെ തടി കൊണ്ടുള്ള ജനാല വഴി സുഭാഷ് റോഡിലേക്ക് വീണു. തുടര്ന്ന് നാട്ടുകാര് പോലീസില് വിവരം അറിയിച്ചു. പോലീസ് എത്തി സുഭാഷിനെ മെഡിക്കല് കോളേജിലേക്ക് കൊണ്ടുപോയി. അവിടെ എത്തിയപ്പോഴേക്കും സുഭാഷ് കുമാര് മരിച്ചിരുന്നു. സുഭാഷിന്റെ കൂടെയുണ്ടായിരുന്ന മൂന്ന് പേരില് രണ്ടു പേരെ സംഭവ സമയത്ത് തന്നെ പോലീസ് കസ്റ്റഡിയിലെടുത്തു. ഒരാളെ ഇന്ന് രാവിലെയാണ് കസ്റ്റഡിയിലെടുത്തത്. ഇവരെ ചോദ്യംചെയ്തു വരികയാണ്.
