ലഖ്നോ : ഭാര്യയുമായി വഴിക്കിട്ടശേഷം എട്ടുമാസം പ്രായമായ കുഞ്ഞിനെ പിതാവ് നിലത്തടിച്ച്‌ കൊന്നു. യുപിയിലെ ബിജ്നോറിലാണ് മനസാക്ഷിയെ ഞെട്ടിക്കുന്ന സംഭവം. കുഞ്ഞ് മരിക്കുന്നതുവരെ തറയിലടിച്ചതായി ഭാര്യ പോലീസിന് നല്‍കിയ പരാതിയില്‍ ചൂണ്ടിക്കാട്ടുന്നു .മണ്ഡാവാലി പോലീസ് സ്റ്റേഷന്‍ പരിധിയിലെ രഹത്പുര്‍ ഖുര്‍ദില്‍ ജൂലൈ 31നാണ് സംഭവം നടന്നത്.
ഒന്നര വര്‍ഷം മുന്‍പായിരുന്നു മുഹമ്മദ് നസിമിന്‍റെയും മഹ്താബ് ജഹന്‍റെയും വിവാഹം. ഇവര്‍ക്ക് എട്ടുമാസം പ്രായമായ മകളുമുണ്ടായിരുന്നു. ഭാര്യയും ഭര്‍ത്താവും തമ്മില്‍ നിരന്തരം വഴക്കിട്ടിരുന്നു. കുറച്ചുദിവസം മുന്‍പ് നസിമുമായുണ്ടായ വഴക്കിനെ തുടര്‍ന്ന് മഹ്താബ് സ്വന്തം വീട്ടിലേക്ക് മടങ്ങി. ജൂലൈ 31ന് രാത്രി നസിം മദ്യപിച്ച്‌ മഹ്താബിന്‍റെ വീട്ടിലെത്തി. കുഞ്ഞിനെ വിട്ടുനല്‍കണമെന്നായിരുന്നു നസിം ആവശ്യപ്പെട്ടത്.
മഹ്താബ് ഇതിന് വിസമ്മതിച്ചതോടെ ഇരുവരും തമ്മില്‍ ഏറ്റുമുട്ടലായി. ഇതോടെ ബലമായി പിടിച്ചുവാങ്ങിയശേഷം കുട്ടിയെ മരിക്കുന്നതുവരെ തറയില്‍ അടിക്കുകയായിരുന്നു. ഉടന്‍തന്നെ കുട്ടിയെ ആശുപത്രിയിലെത്തിച്ചെങ്കിലും ജീവന്‍ നഷ്ടപ്പെട്ടിരുന്നു. മഹ്താബിന്‍റെ പരാതിയില്‍ ആഗസ്റ്റ് 1 ന് നസിമിനെ പോലീസ് അറസ്റ്റ് ചെയ്തു. ഇയാളെ റിമാന്‍ഡ് ചെയ്തതായും ബിജ്നോര്‍ പോലീസ് സൂപ്രണ്ട് ധരംവീര്‍ സിങ് അറിയിച്ചു .
