കായംകുളം : സാമൂഹിക പരിഷ്കര്ത്താവ് മന്നത്ത് പത്മനാഭന് സി.പി.എം സമ്മേളന പ്രചാരണനായകന്. ഈ മാസം 17, 18,19 തീയതികളിലെ സി.പി.എം കായകുളം ഏരിയ സമ്മേളനത്തിന്റെ പ്രചാരണഭാഗമായി കണ്ടല്ലൂര് പറവൂര് മുക്കിലാണ് വിമോചന സമരനായകന് മന്നത്ത് പത്മനാഭന്റെ ചിത്രം ഉള്പ്പെടുത്തിയ ഫ്ലക്സ് ബോര്ഡ് സ്ഥാപിച്ചത്. സമൂഹ മാധ്യമങ്ങളില് വിമര്ശനമുയര്ന്നതോടെ വിശദീകരണവുമായി പാര്ട്ടിയും രംഗത്തെത്തി. നവോത്ഥാന നായകന് എന്നനിലയിലാണ് ചിത്രം ഉള്പ്പെടുത്തിയതെന്ന് ഏരിയ സെക്രട്ടറി പി.അരവിന്ദാക്ഷന് പറഞ്ഞു. വിമോചന സമരനായകനെ പ്രചാരണബോര്ഡില് ഉള്പ്പെടുത്തിയ നടപടി സി.പി.എമ്മിലും സജീവചര്ച്ചയാണ്.
കമ്യൂണിസ്റ്റുകാരെ റഷ്യയിലേക്ക് പറഞ്ഞുവിടും വരെ വിശ്രമമില്ലെന്ന് പ്രഖ്യാപിച്ച് വിമോചനസമരം നയിച്ച മന്നത്ത് പത്മനാഭന്റെ ചിത്രം പ്രചാരണബോര്ഡില് വെച്ചതാണ് പാര്ട്ടിക്കുള്ളില് ചര്ച്ചക്ക് കാരണമായത്. അതേസമയം, ശബരിമല സ്ത്രീപ്രവേശന വിഷയത്തിലും കഴിഞ്ഞ നിയമസഭ തെരഞ്ഞെടുപ്പു കാലത്തും സര്ക്കാറുമായി പരസ്യമായി കൊമ്പുകോര്ത്ത എന്.എസ്.എസ് ഏറ്റവുമൊടുവില് മുന്നാക്കവിഭാഗത്തില് സാമ്പത്തികമായി പിന്നാക്കം നില്ക്കുന്നവരെ കണ്ടെത്താനുള്ള സാമ്പത്തിക സര്വേക്കെതിരെയും രൂക്ഷവിമര്ശനമാണ് ഉന്നയിച്ചത്. ഇതിനിടെയാണ് പാര്ട്ടിയുടെ ശക്തികേന്ദ്രമായ കായംകുളത്തെ ഏരിയ സമ്മേളന പ്രചാരണത്തിന് സമുദായാചാര്യന് മന്നത്ത് പത്മനാഭനെ നവോത്ഥാന നായകനാക്കി ഉയര്ത്തിയുള്ള ബോര്ഡ് പ്രത്യക്ഷപ്പെട്ടത്.
