പത്തനംതിട്ട : ബേക്കറിയില് നിന്ന് ചിക്കന് വിഭവങ്ങള് കഴിച്ചവര്ക്ക് കൂട്ടത്തോടെ ഭക്ഷ്യവിഷബാധ. ഇരുപതോളം പേര് ഇതുവരെ ചികിത്സ തേടി. കൂടുതല് പേര് ആശുപത്രികളിലേക്ക് എത്തുന്നു. ആരുടെയും നില ഗുരുതരമല്ലെങ്കിലും കുട്ടികള് അടക്കം അവശനിലയിലാണ്. ഭക്ഷ്യസുരക്ഷ ആരോഗ്യ വകുപ്പുകള് സംയുക്തമായി ബേക്കറിയില് പരിശോധന നടത്തി സാമ്പിളുകള് ശേഖരിച്ചു. ബേക്കറി അടച്ചു പൂട്ടുകയും ചെയ്തു. ആരോഗ്യമന്ത്രിയുടെ മണ്ഡലത്തിലുള്ള മെഴുവേലി പഞ്ചായത്തില് ഇലവുംതിട്ട ജംഗ്ഷനില് പ്രവര്ത്തിക്കുന്ന ദീപ ബേക്ക് ഹൗസ് ആന്ഡ് ബേക്കറിയില് നിന്ന് ഭക്ഷണം കഴിച്ചവര്ക്കാണ് വയറിളക്കവും പനിയും മറ്റ് അസ്വസ്ഥതകളും അനുഭവപ്പെട്ടത്. നിലവില് ചികിത്സ തേടിയവരുടെ കണക്ക് 15 ആണെങ്കിലും സ്വകാര്യാശുപത്രികളില് കൂടുതല് പേര് ചികില്സ തേടിയതായും പറയുന്നു.
ആറ്, ഏഴ് തീയതികളില് ഇവിടെ നിന്ന് ചിക്കന് വിഭവങ്ങള് വാങ്ങിക്കഴിച്ച മെഴുവേലി, ചെന്നീര്ക്കര പഞ്ചായത്തുകളില് നിന്നുള്ളവരാണ് ചികിത്സ തേടിയത്. 13 പേര് ചെന്നീര്ക്കര പഞ്ചായത്ത് നല്ലാനിക്കുന്ന് കുടുംബാരോഗ്യ കേന്ദ്രത്തില് ചികിത്സയില് കഴിയുന്നു. രണ്ടു പേര് ഇന്നലെ വൈകിട്ട് തിരുവല്ല പുഷ്പഗിരി മെഡിക്കല് കോളേജില് ചികിത്സ തേടി. ചെന്നീര്ക്കര പഞ്ചായത്തില് നിന്ന് പന്ത്രണ്ടും മെഴുവേലി പഞ്ചായത്തില് നിന്ന് മൂന്നു പേരുമാണ് ഇതു വരെ ചികിത്സ തേടിയിരിക്കുന്നത്. ചെന്നീര്ക്കര രണ്ടാം വാര്ഡില് ആത്രപ്പാട് സ്വദേശി അച്ചു ആനന്ദ് (23), ശിവന്യ (എട്ട്), ശ്രേയ (എട്ട്), ശ്രുതി (18), കുളത്തുമണ്ണില് അശ്വിന് ബിനോജ് (14), ശ്യാംകുമാര് (38), വിനോദ് ജോണ് (47), ശിവാനി (ഒമ്പത്), സൗമ്യ ഭവനില് ധന്യ (32), മിഥുന്യ (അഞ്ച്), മന്യ(12), ഊന്നുകല് കിഴക്കേച്ചരുവില് ഉഷ (65), അശ്വതി (24) എന്നിവരാണ് ചെന്നീര്ക്കര കുടുംബാരോഗ്യ കേന്ദ്രത്തില് ചികിത്സയിലുള്ളത്. ഊന്നുകല് സ്വദേശികളാ ടീന മറിയം, അനീന മറിയം എന്നിവര് തിരുവല്ല പുഷ്പഗിരി മെഡിക്കല് കോളേജില് ചികിത്സയിലാണ്.
