ചെന്നൈ: റിലീസിനൊരുങ്ങുന്ന വിജയ് ചിത്രം മാസ്റ്ററിന്റെ രംഗങ്ങള്‍ പുറത്തായി. സിനിമയുടെ ക്ലൈമാക്സ് രംഗങ്ങളാണ് ചോര്‍ന്നത്. ഇവ സമൂഹമാധ്യമങ്ങളില്‍ പ്രചരിക്കുന്നുണ്ട്‌. വിതരണക്കാര്‍ക്കായി നടത്തിയ ഷോയ്ക്കിടെയാണ് രംഗങ്ങള്‍ ചോര്‍ന്നത്. സംഭവത്തില്‍ സിനിമയുടെ നിര്‍മ്മാണ കമ്പിനി മദ്രാസ് ഹൈക്കോടതിയെ സമീപിച്ചു.
സിനിമയുടെ വ്യാജപതിപ്പുകള്‍ പ്രചരിപ്പിക്കരുതെന്ന് അണിയറപ്രവര്‍ത്തകര്‍ അഭ്യര്‍ഥിച്ചു. 1.5 വര്‍ഷത്തെ അധ്വാനം ഇല്ലാതാക്കരുതെന്ന് സംവിധായകന്‍ ലോകേഷ് കനകരാജ് പറഞ്ഞു. അഭ്യര്‍ഥനയുമായി മറ്റ് തമിഴ് സംവിധായകരും രംഗത്തെത്തി. രംഗങ്ങള്‍ ചോര്‍ത്തിയത് സോണി ഡിജിറ്റല്‍ സിനിമാസിലെ ജീവനക്കാരനാണെന്ന് നിര്‍മ്മാണ കമ്പിനി ആരോപിച്ചു. ഇയാള്‍ക്കെതിരെ പരാതി നല്‍കുകയും ചെയ്തു. മാസ്റ്റര്‍ സിനിമയെ തകര്‍ക്കാനുള്ള ഗൂഢാലോചനയാണ് നടന്നതെന്ന് നിര്‍മ്മാണ കമ്പിനി കുറ്റപ്പെടുത്തി. മാസങ്ങള്‍ നീണ്ട കാത്തിരിപ്പിനൊടുവില്‍ ബുധനാഴ്ചയാണ് മാസ്റ്റര്‍ തീയറ്ററുകളിലെത്തുന്നത്. ഇതിനിടെയാണ് സിനിമ വലിയ രീതിയില്‍ പ്രതിസന്ധി നേരിടുന്നത്.
