തിരുവനന്തപുരം: തനിക്കെതിരായ വിജിലന്സ് പ്രാഥമിക അന്വേഷണത്തില് പ്രതികരിച്ച് മാത്യു കുഴല്നാടന് എംഎല്എ. ‘പറഞ്ഞ നിലപാടില് മാറ്റമില്ല. ഏതൊരു അന്വേഷണത്തെയും സര്വ്വാത്മനാ സ്വാഗതം ചെയ്യുന്നു. സര്ക്കാരിന് എത്ര വേണമെങ്കിലും അന്വേഷിക്കാം.’ വിശദമായി നാളെ പ്രതികരിക്കാമെന്നാണ് മാത്യു കുഴല്നാടന് പറഞ്ഞത്. മാത്യു ചിന്നക്കനാലില് ഭൂമിയും കെട്ടിടവും വാങ്ങിയതിലെ ക്രമക്കേട് അന്വേഷിക്കാനാണ് വിജിലന്സിന് അനുമതി നല്കിയത്. വിജിലന്സ് ഡയറക്ടറുടെ റിപ്പോര്ട്ടിന്റെ അടിസ്ഥാനത്തില് ആഭ്യന്തര സെക്രട്ടറിയാണ് ഉത്തരവിറക്കിയത്.
അതേസമയം കുഴല്നാടന്റെ ഉടമസ്ഥതയിലുള്ള ചിന്നക്കനാലിലെ കപ്പിത്താന്സ് റിസോര്ട്ടിന് കഴിഞ്ഞ ദിവസം ചിന്നക്കനാല് പഞ്ചായത്ത് ഹോം സ്റ്റേ ലൈസന്സ് പുതുക്കി നല്കിയിരുന്നു. ലൈസന്സിന്റെ കാലാവധി മാര്ച്ച് 31ന് അവസാനിച്ചിരുന്നു. തുടര്ന്ന് അഞ്ചു വര്ഷത്തേക്ക് ലൈസന്സ് പുതുക്കി നല്കാന് അപേക്ഷ നല്കി. പോലീസ് ക്ലിയറന്സ് സര്ട്ടിഫിക്കറ്റും മലിനീകരണ നിയന്ത്രണ ബോര്ഡിന്റെ സര്ട്ടിഫിക്കറ്റും ഹാജരാക്കാന് നിദ്ദേശം നല്കി. ഇവ ഹാജരാക്കിയതിനെ തുടര്ന്നാണ് കഴിഞ്ഞ ദിവസം ലൈസന്സ് പുതുക്കി നല്കിയത്.
