തിരുവനന്തപുരം : സർക്കാർ ജീവനക്കാരും അധ്യാപകരും ഉൾപ്പെടെ 11,100 ജീവനക്കാർ ഈ വർഷം മെയ് 31നു വിരമിക്കും. പൊതുമേഖലാ സ്ഥാപനങ്ങളെ ഒഴിവാക്കിയാണ് ഈ കണക്ക്. എല്ലാ മാസവും ജീവനക്കാർ വിരമിക്കുന്നുണ്ടെങ്കിലും കൂട്ട വിരമിക്കൽ മെയ് മാസത്തിലാണ് നടക്കുന്നത്. കഴിഞ്ഞ മേയിൽ 9,205 പേർ വിരമിച്ചു. വിരമിക്കൽ ആനുകൂല്യങ്ങൾ നൽകാൻ 4,000 കോടി രൂപ ആവശ്യമാണ്.ഇത് എല്ലാവർക്കും ഒരേ സമയം കൊടുക്കണമെന്നില്ല.
ഔപചാരികതകൾ പൂർത്തിയാക്കി അക്കൗണ്ടന്റ് ജനറൽ അംഗീകരിച്ചതിനു ശേഷം മാത്രമേ ആനുകൂല്യങ്ങൾ നൽകുകയുള്ളൂ. അതിനാൽ അടിയന്തര സാമ്പത്തിക സമ്മർദ്ദം ഉണ്ടാകില്ലെന്നാണ് ധനവകുപ്പിന്റെ നിലപാട്. ഓരോ വർഷവും 20,000 പേർ വിരമിക്കുന്നു. ഈ സാമ്പത്തിക വർഷത്തിന്റെ വിവിധ മാസങ്ങളിലായി 21,083 ജീവനക്കാർ വിരമിക്കുമെന്ന് ശമ്പള കമ്മീഷൻ റിപ്പോർട്ടിൽ പറയുന്നു.
