പത്തനംതിട്ട : കോഴഞ്ചേരി പൊയ്യാനില്‍ ആശുപത്രി രോഗിക്ക് 16,00,00 രൂപ നഷ്ട പരിഹാരം നല്‍കാന്‍ പത്തനംതിട്ട കണ്‍സ്യൂമര്‍ കോടതി വിധിച്ചു. പൊയ്യാനില്‍ ആശുപത്രിയിലെ ഗൈനക്കോളജിസ്റ്റ് ഡോ.പ്രമീള ആര്‍ ഫിലിപ്പിനെ ഒന്നാം എതിര്‍കക്ഷിയായും പൊയ്യാനില്‍ ആശുപത്രിയെ രണ്ടാം എതിര്‍കക്ഷിയായും ചെങ്ങന്നൂര്‍ ശ്രീരംഗം വീട്ടില്‍ ഡോക്ടര്‍ പ്രീത ആര്‍ പിള്ള 2015 ല്‍ പത്തനംതിട്ട ഉപഭോകൃത കോടതിയില്‍ നല്‍കിയ ഹര്‍ജിയിലാണ് കോടതി വിധി .
2015ല്‍ പ്രസവസംബന്ധമായ ചികിത്സയ്ക്കുവേണ്ടി ഡോക്ടര്‍ പ്രീത ആര്‍ പിള്ള പൊയ്യാനില്‍ ആശുപത്രിയില്‍ ചികിത്സ തേടിയിരുന്നു. തുടര്‍ന്ന് ശസ്ത്രക്രിയയിലൂടെ കുഞ്ഞിന് ജന്മം നല്‍കുകയും ചെയ്തു. പ്രസവത്തോടനുബന്ധിച്ച് പ്രീതയുടെ ഇരുവൃക്കകള്‍ക്കും തകരാര്‍ സംഭവിച്ചു. ഡോക്ടറുടേയും ആശുപത്രി അധികൃതരുടെയും ചികിത്സാപ്പിഴവ് മൂലം ഇരുവൃക്കകളും തകരാറിലായതിനെ തുടര്‍ന്ന് എറണാകുളം അമൃത ആശുപത്രിയില്‍ വിദഗ്ധ ചികിത്സ തേടേണ്ടി വന്ന സാഹചര്യത്തിലാണ് ഡോക്ടറെയും ആശുപത്രി അധികൃതരെയും എതിര്‍കക്ഷികളാക്കി ഉപഭോകൃത തര്‍ക്ക പരിഹാര കോടതിയെ സമീപിച്ചത്.
പ്രസവ സമയത്ത് പ്രീതയ്ക്ക് നല്‍കിയ മരുന്നുകളുടെ പ്രതിപ്രവര്‍ത്തമാണ് വൃക്കകള്‍ക്ക് തകരാര്‍ സംഭിക്കാന്‍ കാരണമായതെന്നാണ് ഹര്‍ജിക്കാരിയുടെ വാദം. ഇരുകക്ഷികളുടെയും വാദം കേട്ടശേഷമാണ് ഹര്‍ജിക്കാരിക്ക് നഷ്ടപരിഹാരം നല്‍കണമെന്ന് ഉപഭോക്തൃ തര്‍ക്ക പരിഹാര ഫോറം പ്രസിഡന്റ് ബേബിച്ചന്‍ വെച്ചുച്ചിറ, മെമ്പര്‍മാരായ എന്‍ ഷാജിതാ ബീബി , നിഷാദ് തങ്കപ്പന്‍ എന്നിവര്‍ വിധി പ്രസ്താവിച്ചത്‌.
