ഇംഗ്ലണ്ട്: യൂറോപ്പില്‍ മെറ്റ എഐ മോഡലുകള്‍ അവതരിപ്പിക്കാനുള്ള പദ്ധതി നിര്‍ത്തലാക്കി മെറ്റ പ്ലാറ്റ്‌ഫോംസ്. ചൂറോപ്പിലെ ഫേസ്ബുക്ക്, ഇന്‍സ്റ്റാഗ്രാം ഉപഭോക്താക്കളുടെ ഡാറ്റ ഉപയോഗിക്കുന്നത് നിര്‍ത്തിവെച്ചുകൊണ്ടുള്ള ഐറിഷ് അധികൃതരുടെ നിര്‍ദേശം ലഭിച്ചതോടെയാണ് എഐ മോഡലുകള്‍ അവതരിപ്പിക്കാനുള്ള പദ്ധതി ഉപയോഗിച്ചത്. ഫേസ്ബുക്കിനെതിരെ നടപടി ആവശ്യപ്പെട്ട് ഓസ്ട്രിയ, ബെല്‍ജിയം, ഫ്രാന്‍സ്, ജര്‍മനി, ഗ്രീസ്, ഇറ്റലി, അയര്‍ലണ്ട്, നെതര്‍ലാന്‍ഡ്‌സ്, നോര്‍വേ, പോളണ്ട്, സ്‌പെയ്ന്‍ എന്നീ രാജ്യങ്ങളിലെ ഡാറ്റാ പ്രൊട്ടക്ഷന്‍ അതോറ്റികള്‍ക്ക് ലഭിച്ച പരാതികളുടെയും എന്‍ഓവൈബി എന്ന സംഘടനയുടെ ഇടപെടലിന്റെയും പശ്ചാത്തലത്തിലാണ് മെറ്റയുടെ തീരുമാനം.
പരസ്യമായി ലഭ്യമായതും ലൈസന്‍സ് നേടിയതുമായ ഓണ്‍ലൈന്‍ വിവരങ്ങള്‍ ഇതിനായി ഉപയോഗിക്കുമെന്ന് മെറ്റ പ്രഖ്യാപിച്ചിരുന്നുവെങ്കിലും അനുവാദമില്ലാതെ ഉപഭോക്താക്കളുടെ വ്യക്തിവിവരങ്ങള്‍ എഐ മോഡലുകളെ പരിശീലിപ്പിക്കാന്‍ ഉപയോഗിക്കാനുള്ള മെറ്റയുടെ പദ്ധതിയാണ് ഇവിടെ പ്രശ്‌നമായത്. തുടര്‍ന്ന് ജനറേറ്റീവ് എഐ മോഡലുകളുടെ പരിശീലനം നിര്‍ത്തിവെക്കാന്‍ ഐറിഷ് ഡാറ്റാ പ്രൊട്ടക്ഷന്‍ അതോറിറ്റി മെറ്റയോട് ആവശ്യപ്പെടുകയായിരുന്നു.
