ചാരുംമൂട്: മിനി ടാങ്കര്‍ ബൈക്കിലിടിച്ച്‌ ബൈക്ക് യാത്രികരായ അച്ഛനും മകളും മരിച്ചു. നൂറനാട് ഇടപ്പോണ്‍ പാറ്റൂര്‍ ഇഞ്ചക്കലോ‍ടില്‍ ഇ.കെ.തോമസ്(57), മകള്‍ ഡി. ഫാം വിദ്യാര്‍ഥിനി ജോസി തോമസ് (21) എന്നിവരാണ് മരിച്ചത്.
ഇന്നലെ ഉച്ചയ്ക്ക് ഒരുമണിയോടെ പാറ ഇടപ്പോണ്‍ റോഡില്‍ പടനിലം ആല്‍മാവ് മുക്കിലായിരുന്നു അപകടം. ജോയിക്കുട്ടിയും മകള്‍ ജോസിയും പടനിലത്തേക്ക് വരുമ്പോള്‍ ഇടപ്പോണ്‍ ഭാഗത്തേക്ക് അമിതവേഗത്തില്‍ വന്ന മിനി ടാങ്കറുമായി ഇടിക്കുകയായിരുന്നു. ഇടിയുടെ ആഘാതത്തില്‍ സംഭവസ്ഥലത്തുണ്ടായിരുന്ന മൈല്‍ക്കുറ്റിയില്‍ തലയിടിച്ചാണ് ജോയിക്കുട്ടി മരിച്ചത്. ഇതേ സ്ഥലത്തുതന്നെ നിലനിന്നിരുന്ന പഴയ കാത്തിരിപ്പ് കേന്ദ്രത്തിന്റെ ഭിത്തിയില്‍ തലയിടിച്ചാണ് ജോസി മരിച്ചത്.
ബിഎസ്‌സി ഫിസിക്സ് ബിരുദം പൂര്‍ത്തിയാക്കിയ ജോസി കണ്ണൂര്‍ എംജിഎം കോളേജ് ഓഫ് ഫാര്‍മസിയില്‍ ഡി.ഫാം വിദ്യാര്‍ഥിനിയായി ചേര്‍ന്നത് കഴിഞ്ഞദിവസമാണ്. കോളേജിലെ ആവശ്യത്തിനായി വരുമാന സര്‍ട്ടിഫിക്കറ്റിന് വേണ്ടി പടനിലത്തുള്ള നൂറനാട് വില്ലേജ് ഓഫിസിലേക്ക് പോകുമ്പോഴായിരുന്നു അപകടം. ജോയിക്കുട്ടിയുടെ ഭാര്യ: ശാന്തമ്മ, മകന്‍: ജോസന്‍ തോമസ്.
