ഡല്ഹി : കോവിഡ് പ്രതിരോധത്തിനായി 150 രാജ്യങ്ങളെ സഹായിച്ചെന്ന പ്രധാനമന്ത്രിയുടെ പ്രസ്താവന തെറ്റെന്ന് വിവരാവകാശ രേഖ. വിവരാവകാശ അപേക്ഷക്ക് മറുപടിയായി വിദേശകാര്യമന്ത്രാലയം നല്കിയത് 81 രാജ്യങ്ങളുടെ പട്ടിക. ചൈനക്ക് 1.87 കോടി രൂപയുടെ സഹായം നല്കിയതായും രേഖകളില് പറയുന്നു. എന്നാല് 2.11 കോടിയുടെ സഹായം നല്കി എന്നാണ് കേന്ദ്രമന്ത്രി വി മുരളീധരന് ലോക്സഭയെ അറിച്ചിരുന്നത്.
ജൂലൈ 17ന് UN സാമ്പത്തിക സാമൂഹിക കൗണ്സിലില് പ്രസംഗിക്കവെ 150 രാജ്യങ്ങള്ക്ക് കോവിഡ് പ്രതിരോധത്തിന് സഹായം നല്കിയെന്നാണ് പ്രധാനമന്ത്രി നരേന്ദ്ര മോദി പറഞ്ഞത്. ഇത് തെറ്റാണെന്നാണ് ആക്ടിവിസ്റ്റ് വെങ്കടേഷ് നായികിന് ലഭിച്ച വിവരാവകാശ രേഖ വ്യക്തമാക്കുന്നത്.
81 രാജ്യങ്ങളുടെ പേരാണ് വിദേശകാര്യ മന്ത്രാലം നല്കിയ പട്ടികയില് ഉള്ളത്. ആഗസ്റ്റ് ആദ്യ ആഴ്ച വരെ മറ്റ് രാജ്യങ്ങള്ക്കായി 97.73 കോടി രൂപയുടെ സഹായമാണ് നല്കാനുദ്ദേശിച്ചിരുന്നത് എങ്കിലും നല്കിയത് 69.72കോടിയുടെ സഹായമാണ്. 1.87 കോടി രൂപയുടെ സഹായം ചൈനക്ക് നല്കി. ഇതിനായുള്ള യാത്രക്കും മറ്റുമായി ഇന്ത്യ 4.24 കോടി ചിലവാക്കി എന്നും രേഖകള് വ്യക്തമാക്കുന്നു.
