ചെന്നൈ : തമിഴ്നാട് വേളാങ്കണ്ണിയില് പണം ഇടപാടുകാരനെ ഓഫീസില് കയറി വെട്ടിക്കൊന്നു. നാഗപട്ടണം സ്വദേശി ടി വി ആര് മനോഹറിനെയാണ് അജ്ഞാതസംഘം വെട്ടിക്കൊലപ്പെടുത്തിയത്. ബുധനാഴ്ച രാത്രിയാണ് സംഭവം. ഓഫീസില് ഇരുന്ന് പണം എണ്ണിത്തിട്ടപ്പെടുത്തുന്നതിനിടെ അതിക്രമിച്ചുകയറിയ സംഘം വെട്ടിക്കൊലപ്പെടുത്തുകയായിരുന്നു. മൂന്ന് പേരാണ് കൊലയാളി സംഘത്തിലുണ്ടായിരുന്നത്. ആദ്യം ചെറുത്തുനില്ക്കാന് ശ്രമിച്ചെങ്കിലും മനോഹര് ഒടുവില് മരണത്തിന് കീഴടങ്ങുകയായിരുന്നു. ആക്രമണത്തിന് ശേഷം പ്രതികള് രക്ഷപ്പെട്ടു.
സംഭവസമയം ഓഫീസിലുണ്ടായിരുന്ന മണിവേല് എന്നയാള്ക്കും ആക്രമണത്തില് ഗുരുതരമായി പരിക്കേറ്റു. മനോഹറിനെ രക്ഷിക്കാന് ശ്രമിക്കുന്നതിനിടെയാണ് മണിവേലിന് പരിക്ക് പറ്റിയത്. ഇയാളെ ആശുപത്രിയില് പ്രവേശിപ്പിച്ചിരിക്കുകയാണ്. ആക്രമണം നടന്ന സമയം പ്രതികള് മുഖംമൂടി ധരിച്ചിരുന്നതിനാല് ഇവരെ തിരിച്ചറിയാന് സാധിച്ചിട്ടില്ല. സിസിടിവി ദൃശ്യങ്ങള് പരിശോധിച്ചുവരികയാണ്. സംഭവത്തില് അന്വേഷണം ആരംഭിച്ചതായി പോലീസ് അറിയിച്ചു.
