തിരുവനന്തപുരം : ബംഗാള് ഉള്ക്കടലിലെ ന്യൂനമര്ദത്തിന്റെ സ്വാധീന ഫലമായി എറണാകുളം, ഇടുക്കി, കോട്ടയം, ആലപ്പുഴ, പത്തനംതിട്ട, കൊല്ലം, തിരുവനന്തപുരം ജില്ലകളില് ഇന്നു ശക്തമായ മഴയ്ക്കു സാധ്യതയുള്ളതിനാല് യെല്ലോ അലര്ട്ട് പ്രഖ്യാപിച്ചു. നാളെയും കേരളത്തിലാകെ കനത്ത മഴയ്ക്കു സാധ്യതയുണ്ട്.
ആന്ഡമാനു സമീപം രൂപം കൊണ്ട ന്യൂനമര്ദം ഇന്നലെ ഉച്ചയോടെ തീവ്രന്യൂനമര്ദമായി മാറി. ഇന്നു രാവിലെയോടെ യാസ് ചുഴലിക്കാറ്റായി മാറും. വീണ്ടും ശക്തിയാര്ജിച്ച് തീവ്ര ചുഴലിക്കാറ്റായി മാറി മറ്റന്നാള് വടക്കന് ഒഡീഷ-പശ്ചിമബംഗാള് തീരത്ത് കരയില് പ്രവേശിക്കുമെന്നാണു വിലയിരുത്തല്. ന്യൂനമര്ദഫലമായി അറബിക്കടലിലെ കാലവര്ഷക്കാറ്റ് ശക്തി പ്രാപിച്ചതാണ് മഴ സജീവമാക്കിയത്.
ഈ വര്ഷം മാര്ച്ച് 1 മുതല് ഇതുവരെ 128% അധികമഴ ലഭിച്ചു. സമീപകാലത്തെ ഏറ്റവും ഉയര്ന്ന വേനല്മഴ കണക്കാണിത്. 2014, 2016, 2017, 2019 വര്ഷങ്ങളില് വേനല്മഴ ശരാശരിയെക്കാള് കുറഞ്ഞു. 2015 (23%), 2018 (37%), 2020 (7%) വര്ഷങ്ങളിലാണ് കൂടുതല് മഴ ലഭിച്ചത്.