ന്യൂഡല്‍ഹി: വിവാദങ്ങള്‍ക്കൊടുവില്‍ സുപ്രീം കോടതി മുന്‍ ചീഫ് ജസ്റ്റിസ് രഞ്ജന്‍ ഗൊഗോയ് രാജ്യസഭാ എം.പി.യായി സത്യപ്രതിജ്ഞ ചെയ്തു. രാഷ്ട്രപതി രാംനാഥ് കോവിന്ദാണ് ഗൊഗോയിയെ രാജ്യസഭയിലേക്ക് നാമനിര്‍ദേശം ചെയ്തത്. രാജ്യസഭാ എം.പി.യാകുന്ന ആദ്യ ചീഫ് ജസ്റ്റിസാണ് ഗൊഗോയ്.
അതേസമയം അദ്ദേഹത്തെ നാമനിര്‍ദേശം ചെയ്ത നടപടിയെ വിമര്‍ശിച്ച്‌ നിരവധി പ്രമുഖര്‍ രംഗത്ത് വന്നിരുന്നു. അദ്ദേഹത്തിന്റെ സഹപ്രവര്‍ത്തകരായിരുന്ന മുന്‍ ജഡ്ജിമാരടക്കം വിമര്‍ശനമുന്നയിച്ചിരുന്നു. ജുഡീഷ്യറിയില്‍ സാധാരണ ജനങ്ങള്‍ക്കുള്ള വിശ്വസവും സുപ്രീം കോടതിയുടെ പരമാധികാരത്തെ ചോദ്യം ചെയ്യുന്നതുമാണ് ഈ നടപടി എന്നാണ് ഉയരുന്ന വിമര്‍ശനങ്ങള്‍.
കൂടാതെ ഈ നടപടി ചോദ്യംചെയ്ത് മധുപൂര്‍ണിമ കിഷോര്‍ സുപ്രീംകോടതിയില്‍ പൊതുതാത്പര്യ ഹര്‍ജിയും സമര്‍പ്പിക്കുകയുണ്ടായി. സാമൂഹികപ്രവര്‍ത്തകയും വിദ്യാഭ്യാസ വിദഗ്ധയുമാണ് മധുപൂര്‍ണിമ കിഷോര്‍. വിരമിച്ചശേഷം ജഡ്ജിമാര്‍ പദവികള്‍ സ്വീകരിക്കുന്നത് രാജ്യത്തെ കോടതികളുടെ സ്വാതന്ത്ര്യത്തിനു കളങ്കമേല്‍പ്പിക്കുമെന്ന് ജസ്റ്റിസ് ഗൊഗോയിതന്നെ മുന്‍പ് പറഞ്ഞിട്ടുണ്ടെന്നും പരാതിയില്‍ പറയുന്നുണ്ട്.
അതേസമയം തനിക്കെതിരെ ഉയരുന്ന വിമര്‍ശനങ്ങളില്‍ അദ്ദേഹം ഒന്നും പ്രതികരിച്ചിരുന്നില്ല. സത്യപ്രതിജ്ഞയ്ക്ക് ശേഷം വിശദീകരണം നല്‍കുമെന്നാണ് ഗൊഗോയ് അറിയിച്ചിരുന്നത്.
