തിരുവനന്തപുരം: സിപിഎം തിരുവനന്തപുരം ജില്ലാ കമ്മിറ്റി ഓഫീസിന് നേരെയുണ്ടായ ആക്രമണത്തിന്റെ ഗൂഢാലോചനയില്‍ യുഡിഎഫിലെ ചില പ്രമുഖ നേതാക്കള്‍ക്കും പങ്കുണ്ടെന്ന ആരോപണവുമായി മന്ത്രി മുഹമ്മദ് റിയാസ്. കല്ലേറിനു പിന്നില്‍ ബിജെപി, കോണ്‍ഗ്രസ് അവിശുദ്ധബന്ധമുണ്ടെന്നും റിയാസ് ആരോപിച്ചു. തുടര്‍ഭരണം ദഹിക്കാത്ത ആളുകളാണ് ആക്രമണത്തിന് പിന്നില്‍.
സംസ്ഥാനത്ത് ബോധപൂര്‍വം കുഴപ്പമുണ്ടാക്കാനാണ് ബിജെപിയും കോണ്‍ഗ്രസും ശ്രമിക്കുന്നതെന്നും റിയാസ് പറഞ്ഞു. സിപിഎം ജില്ലാ കമ്മിറ്റി ഓഫീസിന് നേരെയുണ്ടായ ആക്രമണം ആസൂത്രിതമെന്ന് എല്‍ഡിഎഫ് കണ്‍വീനര്‍ ഇ.പി. ജയരാജനും പറഞ്ഞു. ബിജെപിയാണ് ഇതിനു പിന്നില്‍. കേരളത്തിലെ സമാധാനം തകര്‍ക്കാനാണ് അവര്‍ ശ്രമിക്കുന്നത്. ക്വട്ടേഷന്‍ സംഘങ്ങളെ ഇറക്കി ആക്രമണം നടത്താനാണ് ബിജെപിയുടെ നീക്കമെന്നും ജയരാജന്‍ പറഞ്ഞു.
