ഇടുക്കി : മുല്ലപ്പെരിയാര്‍ ഡാമിന്റെ മൂന്ന് ഷട്ടറുകള്‍ അടച്ചു. 1,5,6 ഷട്ടറുകളാണ് അടച്ചത്. 2,3,4 ഷട്ടറുകള്‍ 50 സെന്റിമീറ്റര്‍ വീതമാണ് നിലവില്‍ ഉയര്‍ത്തിയിട്ടുള്ളത്. ജലനിരപ്പ് കുറഞ്ഞതോടെയാണ് മൂന്ന് ഷട്ടറുകള്‍ അടച്ചത്. അതേ സമയം സ്ഥിതിഗതികള്‍ വിലയിരുത്തുന്നതിന് ഉപസമിതി ഡാം സന്ദര്‍ശിക്കുന്നു.
ഉച്ചക്ക് ശേഷം ഉപസമിതി യോഗം ചേര്‍ന്ന് കാര്യങ്ങള്‍ അവലോകനം ചെയ്യും. കേന്ദ്ര ജലക്കമ്മിഷന്‍ എക്‌സികൂട്ടീവ് എഞ്ചിനീയര്‍ ശരവണ കുമാര്‍ അധ്യക്ഷനായ സമിതിയില്‍ ജലവിഭവ വകുപ്പിലെ എന്‍.എസ് പ്രസീദ്, ഹരികുമാര്‍ എന്നിവര്‍ കേരളത്തിന്റെ പ്രതിനിധികളും തമിഴ്‌നാട് പൊതുമരാമത്ത് വകുപ്പ് ഉദ്യോഗസ്ഥരായ സാം ഇര്‍വിന്‍, കുമാര്‍ എന്നിവര്‍ തമിഴ്‌നാട് പ്രതിനിധികളുമാണ്. സ്പില്‍വേ വഴി വെള്ളം തുറന്നു വിട്ടതിനൊപ്പം അണക്കെട്ടിലേക്കുള്ള നീരൊഴുക്കും കുറഞ്ഞതോടെ ജലനിരപ്പ് കുറയുന്നുണ്ട്. ബാക്കിയുള്ള സ്പില്‍വേ ഷട്ടറുകള്‍ അടക്കുന്ന കാര്യത്തില്‍ ഇന്ന് വൈകിട്ടോടെ തീരുമാനമുണ്ടായേക്കും.
