കുമളി : മുല്ലപ്പെരിയാര്‍ ഉപസമിതി സന്ദര്‍ശനത്തിനുശേഷം നടന്ന യോഗത്തില്‍നിന്ന് തമിഴ്നാട് അധികൃതര്‍ ഇറങ്ങിപ്പോയി. ബേബി ഡാമിന് സമീപത്തെ മരങ്ങള്‍ മുറിക്കാന്‍ അനുമതി നല്‍കിയശേഷം ഇത് പിന്‍വലിച്ച വനം വകുപ്പിനെതിരെ പ്രതിഷേധിച്ചാണ് വെള്ളിയാഴ്ച ചേര്‍ന്ന ഉപസമിതി യോഗത്തില്‍നിന്ന് തമിഴ്നാട് ഉദ്യോഗസ്ഥര്‍ ഇറങ്ങിപ്പോയത്. അണക്കെട്ടില്‍ അറ്റകുറ്റപ്പണി നടത്താനുള്ള സാമഗ്രികള്‍ വനത്തിലൂടെ കൊണ്ടുപോകാന്‍ വനപാലകര്‍ അനുവദിക്കുന്നില്ലെന്ന കാരണമാണ് യോഗത്തില്‍ തമിഴ്നാട് ഉദ്യോഗസ്ഥര്‍ ഉന്നയിച്ചത്.
എന്നാല്‍, ഇത്തരത്തില്‍ അനുമതി തേടിയിട്ടില്ലെന്നാണ് വനപാലകര്‍ പറയുന്നത്. രാവിലെ ഉപസമിതി അംഗങ്ങള്‍ അണക്കെട്ട് സന്ദര്‍ശിച്ച്‌ സ്ഥിതിഗതികള്‍ വിലയിരുത്തി. സ്പില്‍വേയിലെ മൂന്ന് ഷട്ടര്‍ ഉയര്‍ത്തി പരിശോധിച്ചു. 129.40 അടിയാണ് അണക്കെട്ടിലെ ജലനിരപ്പ്. ഗാലറിയിലൂടെ മിനിറ്റില്‍ 71 ലിറ്റര്‍ ജലമാണ് പുറത്തേക്ക് ഒഴുകുന്നത്. മുല്ലപ്പെരിയാര്‍ മേല്‍നോട്ട സമിതി ഓഫിസിലാണ് യോഗം ചേര്‍ന്നത്. ചെയര്‍മാന്‍ ശരവണകുമാര്‍, കേരള പ്രതിനിധികളായ ഹരികുമാര്‍, പ്രസീദ്, തമിഴ്നാടിന്റെ സാം ഇര്‍വിന്‍, കുമാര്‍ എന്നിവരാണ് യോഗത്തിനെത്തിയത്.
