കൊച്ചി : കലൂര് കൊലപാതകക്കേസ് പ്രതിയെ പോലീസ് പിടിച്ചത് അതി സാഹസികമായി. സംഭവത്തിന് ശേഷം നാടുവിട്ട മുഖ്യപ്രതി മുഹമ്മദ് ഹസന് (25) വേഷവും രൂപവും മാറ്റി ഒളിവുജീവിതം നയിക്കുകയായിരുന്നു. കൊലപാതകത്തിന് ശേഷം സി.സി.ടി.വി. കേന്ദ്രീകരിച്ച് നടത്തിയ അന്വേഷണത്തില് പ്രതിയെക്കുറിച്ച് വ്യക്തമായ വിവരം പോലീസിന് ലഭിച്ചിരുന്നു. പ്രതികള് ഫോണ് ഉപേക്ഷിച്ചിരുന്നു.
ഇവരുടെ കാര് ബെംഗളൂരുവില് വെച്ച് അപകടത്തില്പ്പെടുകയും പിന്നീട് മുഹമ്മദ് ഹസനും സംഘവും വേഷംമാറി വിവിധ സ്ഥലങ്ങളില് താമസിച്ചുവരുകയായിരുന്നു. പ്രതികള് താടിയും മുടിയും വടിച്ചാണ് ഒളിവില് കഴിഞ്ഞത്. പ്രതികളെ സഹായിക്കാന് സാധ്യതയുള്ളവരെ കേന്ദ്രീകരിച്ച് നടത്തിയ അന്വേഷണത്തിലാണ് കേരള-കര്ണാടക അതിര്ത്തിയില്നിന്ന് സംഘം പിടിയിലായത്. പിടിയിലായ മുഹമ്മദ് ഹസനെ കോടതിയില് ഹാജരാക്കി റിമാന്ഡ് ചെയ്തു. തിങ്കളാഴ്ച കസ്റ്റഡിയില് വാങ്ങും. പ്രാഥമിക ചോദ്യംചെയ്യലില് പ്രതി കുറ്റം സമ്മതിച്ചതായി പോലീസ് അറിയിച്ചു.
