ശാസ്താകോട്ട: ലോട്ടറി വില്പന സ്റ്റാളിലെ ഇരുമ്പ് തട്ടിലേക്ക് വൈദ്യുതി കടത്തിവിട്ട് വില്പനക്കാരിയായ വീട്ടമ്മയെ കൊലപ്പെടുത്താന് ശ്രമം. ശൂരനാട് വടക്കാണ് ഞെട്ടിക്കുന്ന സംഭവം. ചക്കുവള്ളി പുതിയകാവ് റോഡില് കെ.സി.ബി ജങ്ഷന് സമീപമുള്ള പാല് സൊസൈറ്റിയുടെ അടുത്ത് ഇരുമ്പ് തട്ടില് ലോട്ടറി വില്പന നടത്തുന്ന സ്ത്രീയെ ലക്ഷ്യമിട്ടാണ് നീക്കം നടത്തിയതെന്ന് കരുതുന്നു. ഇവര് ദിവസവും വൈകീട്ട് ലോട്ടറി വില്പന കഴിഞ്ഞാല് തട്ട് എടുത്ത് സമീപത്തുള്ള സൊസൈറ്റിയില് വെച്ചിട്ടാണ് പോവുക. ഇന്ന് രാവിലെ ഇവരെ സഹായിക്കാന് ശ്രമിച്ച സഹോദരിയുടെ മകന് ലോട്ടറി തട്ട് എടുക്കാന് ശ്രമിച്ചപ്പോള് ഷോക്കേറ്റ് വീഴുകയായിരുന്നു.
തുടര്ന്ന് പ്രദേശവാസികള് നടത്തിയ പരിശോധനയിലാണ് സമീപത്തെ വൈദ്യുതി ലൈനില്നിന്ന് വയര് ഉപയോഗിച്ച് നേരിട്ട് കണക്ഷനെടുത്ത് ലോട്ടറി തട്ടുമായി ബന്ധിപ്പിച്ച നിലയില് കണ്ടത്. വിവരം ശൂരനാട് കെ.എസ്.ഇ.ബി ഓഫീസില് അറിയിച്ചതിനെ തുടര്ന്ന് ജീവനക്കാരെത്തി വൈദ്യുതി ബന്ധം വിച്ഛേദിച്ചു. സംഭവത്തെകുറിച്ച് പോലീസ് എത്തി അന്വേഷണം നടത്തി. ജീവഹാനി വരെ സംഭവിക്കാവുന്ന തരത്തിലാണ് ക്രൂരകൃത്യം പ്ലാന് ചെയ്തതെന്ന് സംശയിക്കുന്നതായി കെ.എസ്.ഇ.ബി സബ് എഞ്ചിനീയര് പറഞ്ഞു. മറ്റൊരു കൊലപാതകശ്രമക്കേസില് ഒളിവില് കഴിയുന്ന യുവാവാണ് പ്രതിയെന്ന് സംശയിക്കുന്നതായി പോലീസ് പറഞ്ഞു.
