മാവേലിക്കര: വിവാഹ വാര്‍ഷിക ആഘോഷത്തിനിടെ സുഹൃത്തിനെ കുത്തിക്കൊന്ന കേസില്‍ 28കാരന് ജീവപരന്ത്യം തടവും ഒരു ലക്ഷം രൂപ പിഴയും. പുതുപ്പള്ളി വടക്ക് മഠത്തില്‍ വീട്ടില്‍ ബാലകൃഷ്ണപിള്ളയുടെ മകന്‍ ഹരികൃഷ്ണന്‍ (36) കൊല്ലപ്പെട്ട കേസിലാണ് വിധി. പുതുപ്പള്ളി വടക്ക് സ്‌നേഹ ജാലകം കോളനിയില്‍ ജോമോന്‍ ജോയി (28)യെ ആണ് മാവേലിക്കര അഡീഷണല്‍ സെഷന്‍സ് ജഡ്ജി എസ്. എസ്. സീന ശിക്ഷിച്ചത്. പ്രതിയുടെ സുഹൃത്തിനെ മാരകമായി പരിക്കേല്‍പ്പിച്ചതിന് മൂന്നു വര്‍ഷം കഠിന തടവും, 25,000 രൂപ പിഴയും ശിക്ഷയുണ്ട്. ഇതില്‍ തടവ് ശിക്ഷ ഒന്നിച്ച് അനുഭവിച്ചാല്‍ മതിയാകും.
2021 ഡിസംബര്‍ 17ന് രാത്രിയിലാണ് ജോമോന്‍ ജോയിയുടെ വീട്ടില്‍ വെച്ച് ഹരികൃഷ്ണന്‍ കൊല്ലപ്പെട്ടത്. ജോമോന്‍ ജോയിയുടെ ഒന്നാം വിവാഹ വാര്‍ഷിക ദിനത്തില്‍ ആയിരുന്നു സംഭവം. രാത്രി പത്തരയോടെ അമിതമായി മദ്യപിച്ചെത്തിയ ജോമോന്‍ ഭാര്യ മാതാവുമായി വാക്കുതര്‍ക്കമുണ്ടായി. ഇതിന് പിന്നാലെ ജോമോന്‍ ഭാര്യാമാതാവിനെ പിടിച്ചു തള്ളി. വീട്ടിലുണ്ടായിരുന്ന ഹരികൃഷ്ണന്‍ ജോമോനെ ചോദ്യം ചെയ്യുകയും അക്രമം തടയാന്‍ ശ്രമിക്കുകയും ചെയ്തിരുന്നു. പിന്നാലെ ജോമോന്‍ വീട്ടിലെ ഹാളില്‍ വച്ച് സ്വയം കത്തികൊണ്ട് കുത്താന്‍ ശ്രമിക്കുന്നത് കണ്ട് തടയാന്‍ ശ്രമിക്കുന്നതിനിടെ ഹരികൃഷ്ണന്റെ നെഞ്ചില്‍ കുത്തേല്‍ക്കുകയായിരുന്നു.
