കാസര്‍ഗോഡ്: എന്‍ഡോസള്‍ഫാന്‍ ദുരിതബാധിതരെ ഒരുമിച്ച്‌ നിര്‍ത്തി മുന്നോട്ട് കൊണ്ടുപോകുമെന്ന് മന്ത്രി എം വി ഗോവിന്ദന്‍ പറഞ്ഞു. നഷ്ടപരിഹാരം എത്രയും വേഗം നല്‍കുമെന്നും നഷ്ടപരിഹാര പട്ടികയില്‍ ഉള്‍പ്പെടാത്തവര്‍ക്കായി എത്രയും വേഗം ക്യാമ്പ് സംഘടിപ്പിക്കുമെന്നും മന്ത്രി പറഞ്ഞു. എന്‍ഡോസള്‍ഫാന്‍ വിഷത്തില്‍ അകപ്പെട്ട് ജീവിതത്തിന്റെ നൂല്‍പ്പാലത്തിലൂടെ ഇഴഞ്ഞുനീങ്ങുന്ന ഇരകള്‍ക്ക് നീതി ഇപ്പോഴും ഏറെ അകലെയാണ്. സര്‍ക്കാര്‍ ലിസ്റ്റില്‍ ഉള്‍പ്പെട്ടവര്‍ക്ക് പോലും സഹായം ലഭിച്ചിട്ടില്ല. എന്‍ഡോസള്‍ഫാന്‍ ദുരിതബാധിതരായ മക്കളെ കൊന്ന് ആത്മഹത്യ ചെയ്യുന്ന അമ്മമാരുടെ എണ്ണം ജില്ലയില്‍ വര്‍ദ്ധിച്ചു വരികയാണ്. കാസര്‍കോട് ജില്ലയില്‍ 6,725 പേര്‍ എന്‍ഡോസള്‍ഫാന്‍ ദുരിതബാധിതരാണെന്ന് സര്‍ക്കാര്‍ ഔദ്യോഗിക കണക്കുകള്‍ വ്യക്തമാക്കുന്നു. കോടതി ഉത്തരവ് പ്രകാരം ഇതുവരെ 3,000 പേര്‍ക്ക് മാത്രമാണ് ഭാഗികമായോ പൂര്‍ണ്ണമായോ നഷ്ടപരിഹാരം ലഭിച്ചത്. പട്ടിക പ്രകാരം 3,260 പേര്‍ക്ക് സര്‍ക്കാര്‍ ധനസഹായം ലഭിക്കാനുണ്ട്.
