റിയാദ്: കൊവിഡ് ബാധിച്ച്‌ ചികിത്സയിലായിരുന്ന മലയാളി റിയാദില്‍ മരിച്ചു. കൊല്ലം മൈനാഗപ്പള്ളി സ്വദേശി കടപ്പതുണ്ടില്‍ ഷരീഫ് ഇബ്രാഹിം കുട്ടി (43) യാണ്‌ റിയാദ് ശുമൈസി ആശുപത്രിയില്‍ മരിച്ചത് . മൂന്നാഴ്ച മുമ്പ് ന്യൂമോണിയ ബാധിച്ചതിനെ തുടര്‍ന്ന് ആശുപത്രിയില്‍ പ്രവേശിപ്പിച്ചതായിരുന്നു. പിന്നീട് കോവിഡ് ടെസ്റ്റിന്‌ വിധേയനാക്കുകയും രോഗം സ്ഥിരീകരിക്കുകയും ചെയ്തു. ആരോഗ്യ നില വഷളായതിനെ തുടര്‍ന്ന് വെന്റിലേറ്ററില്‍ കഴിയുകയായിരുന്നു. ഇന്ന് വൈകുന്നേരമാണ്‌ മരിച്ചത്. റിയാദ് അതീഖയില്‍ പച്ചക്കറി മാര്‍ക്കറ്റിലെ ജീവനക്കാരനായിരുന്ന ഷരീഫ് അസീസിയയിലായിരുന്നു താമസിച്ചിരുന്നത്.
ശരീഫയാണ്‌ മാതാവ്. ഭാര്യ: സജ്ന. പത്താം ക്ലാസ് വിദ്യാര്‍ത്ഥിനി ജാസ്മിന്‍, ആറാം ക്ലാസ് വിദ്യാര്‍ത്ഥി മുഹമ്മദ് ഷാന്‍ എന്നിവര്‍ മക്കളാണ്‌. ഇതോടെ കോവിഡ് ബാധിച്ച്‌ സൗദി അറേബ്യയില്‍ മരിച്ച മലയാളികളുടെ എണ്ണം എട്ടായി ഉയര്‍ന്നു.
