കോഴിക്കോട്: മകളുടെ സഹപാഠിയായ പതിനേഴുകാരിയെ ലൈംഗികമായി പീഡിപ്പിച്ച കേസില് നാല്പ്പത്തിയഞ്ചുകാരന് തടുവുശിക്ഷ വിധിച്ച് കോടതി. മകളുടെ വിവാഹം ക്ഷണിക്കാനെത്തിയ പിതാവ് പതിനേഴുകാരിയെ ലൈംഗികമായി പീഡിപ്പിക്കുകയായിരുന്നു. നാദാപുരത്താണ് സംഭവം നടന്നത്. പശുപ്പകടവ് തലയഞ്ചേരി വീട്ടില് ഹമീദി (45)നെയാണ് കോടതി ശിക്ഷിച്ചത്. നാദാപുരം അതിവേഗ പോക്സോ കോടതിയാണ് വിധി പ്രസ്താവിച്ചത്. അഞ്ച് വര്ഷം കഠിന തടവിനാണ് പ്രതിയെ ശിക്ഷിച്ചിരുക്കുന്നത്. അതിനൊപ്പംതന്നെ 20,000 രൂപ പിഴയൊടുക്കണമെന്നും ശിക്ഷാവിധിയില് വ്യക്തമാക്കിയിട്ടുണ്ട്.
മനഃസാക്ഷിയില്ലാത്ത ചെയ്തിയാണ് പ്രതിയുടെ ഭാഗത്തു നിന്നുമുണ്ടാതെന്ന് വ്യക്തമാക്കിക്കൊണ്ടാണ് കോടതി പ്രതിക്ക് ശിക്ഷ വിധിച്ചത്. പ്രതി ഒടുക്കേണ്ട പിഴത്തുക പീഡനത്തിന് ഇരയായ പെണ്കുട്ടിക്ക് നല്കാനും കോടതിവിധിച്ചിട്ടുണ്ട്. 2021 ലായിരുന്നു കേസിനാസ്പദമായ സംഭവം നടന്നത്. മകളുടെ വിവാഹം ക്ഷണിക്കാനാണ് പ്രതി പെണ്കുട്ടിയുടെ വീട്ടിലെത്തിയത്. ഈ സമയം പെണ്കുട്ടി മാത്രമായിരുന്നു വീട്ടിലുണ്ടായിരുന്നത്. വീട്ടില് ആരുമില്ലെന്ന് മനസ്സിലാക്കിയ പ്രതി പെണ്കുട്ടിക്കെതിരെ ലൈംഗികാതിക്രമം നടത്തുകയായിരുന്നു.
