പനാജി : നാന പടേക്കറുടെ മരണത്തിൽ അസ്വാഭാവിക മരണത്തിന് ഗോവ പോലീസ് കേസെടുത്തു. മരിച്ച നിലയിലാണ് നാന പടേക്കറെ ആശുപത്രിയിൽ എത്തിച്ചതെന്ന് പോലീസും ആശുപത്രി അധികൃതരും വ്യക്തമാക്കി. കുടുംബാംഗങ്ങളുടെയടക്കം മൊഴി വിശദമായി എടുക്കും. 75കാരനായ പടേക്കര്‍ ഇന്നലെ പുലര്‍ച്ചെ 5.20ഓടെയാണ് ഗോവയിൽ വസതിയിൽ ബോധരഹിതനായി വീഴുന്നത്. തുടര്‍ന്ന് ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു. 45 മിനിറ്റോളം തുടർച്ചയായി സിപിആർ നൽകി ജീവൻ തിരിച്ചെടുക്കാൻ ഡോക്ടർമാർ ശ്രമിച്ചെങ്കിലും പരാജയപ്പെടുകയായിരുന്നുവെന്ന് മണിപ്പാൽ ആശുപത്രിയിലെ ഓങ്കോളജി വിഭാഗം മേധാവി ഡോ. ശേഖർ സൽക്കർ പറയുന്നു.
പോലീസ് റെക്കോർഡ് പ്രകാരം നടനെ ദോന പൗളയിലെ ഓഷ്യൻ പാർക്കിലുള്ള വസതിയിൽ നിന്ന് ബംബോളിമിലെ മണിപ്പാൽ ആശുപത്രിയിലെ അത്യാഹിത വാർഡിൽ എത്തിച്ചപ്പോഴേക്കും മരിച്ചിരുന്നു. പിഎസ്ഐ നിതിൻ നായിക്കിന്റെ നേതൃത്വത്തിൽ തുടരന്വേഷണം പുരോഗമിക്കുകയാണെന്ന് എഎൻഐ റിപ്പോർട്ട് ചെയ്തു. ഗോവയിലെ വീട്ടിൽ നാന ഒറ്റയ്ക്കാണ് താമസിച്ചിരുന്നത്. വ്യാഴാഴ്ച രാത്രി വൈകിയാണ് നടന്റെ അന്ത്യകർമങ്ങൾ നടന്നത്. പൂർണ സംസ്ഥാന ബഹുമതികളോടെയായിരുന്നു സംസ്കാരം.
മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ്, ഉപമുഖ്യമന്ത്രി ഏക്‌നാഥ് ഷിൻഡെ തുടങ്ങി നിരവധി നേതാക്കൾ പൂനെയിലെ നടന്റെ ഫാം ഹൗസിലെത്തി ആദരാഞ്ജലി അർപ്പിച്ചു. നടൻ ജാക്കി ഷറോഫ്, സംവിധായകരായ അനിൽ ശർമ്മ, അനീസ് ബസ്മി, നിർമാതാവ് ഫിറോസ് നദിയാദ്വാല എന്നിവരുൾപ്പെടെ സിനിമാ ലോകത്ത് നിന്നുള്ള നിരവധി പ്രമുഖര്‍ ചടങ്ങിനെത്തിയിരുന്നു.
