കൊണ്ടോട്ടി : മയക്കുമരുന്നു കടത്താന്‍ ശ്രമിച്ച രണ്ടു പേരെ കൊണ്ടോട്ടി പോലീസും ജില്ലാ ആന്‍റി നാര്‍ക്കോട്ടിക്ക് സ്ക്വാഡും ചേര്‍ന്നു പിടികൂടി. മാങ്കാവ് വീട്ടിലകത്ത് ഹിജാസ് (22), കോഴിക്കോട് കല്ലായി അമന്‍ വീട്ടില്‍ അകീല്‍ (20)എന്നിവരെയാണ് എല്‍എസ്ഡി, എംഡിഎ എന്നീ മയക്കുമരുന്നുമായി പോലീസ് അറസ്റ്റ് ചെയ്തത്. കോഴിക്കോട്, മലപ്പുറം ജില്ലകളിലെ കോളജുകളും സ്കൂളുകളും കേന്ദ്രീകരിച്ച്‌ മയക്കുമരുന്നു വില്‍പ്പന നടത്തുന്ന കണ്ണികളിലെ പ്രധാനികളാണ് ഇവരെന്ന് അന്വേഷണ ഉദ്യോഗസ്ഥര്‍ അറിയിച്ചു .
മയക്കുമരുന്നു കടത്താന്‍ ഉപയോഗിച്ച ബൈക്കും ഇവരില്‍നിന്നു കണ്ടെടുത്തു. 2000 രൂപ നിരക്കിലാണ് മയക്കുമരുന്ന് സ്റ്റാമ്പ് വിറ്റിരുന്നത്. കൊറിയര്‍വഴിയും ഇവര്‍ മയക്കുമരുന്ന് എത്തിച്ചു നല്‍കിയിരുന്നതായി ഇവര്‍ പോലീസിനോട് പറയുന്നു. കൈവശം വെച്ചാല്‍ 20 വര്‍ഷത്തിലധികം തടവു ശിക്ഷയും പിഴയും ലഭിക്കുന്ന മയക്കുമരുന്നാണ് ഇവരില്‍നിന്നും പിടികൂടിയത് . ഇതിന് അര ലക്ഷം രൂപയോളം മൂല്യമുണ്ട് . പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.
