പത്തനംതിട്ട : ജില്ലയില്‍ കഞ്ചാവ് ഉള്‍പ്പെടെ മയക്കുമരുന്നുകളുടെ ഉപയോഗം, അനധികൃത വില്‍പന, കൈമാറ്റം എന്നീ കുറ്റകൃത്യങ്ങള്‍ക്കെതിരെ ശക്തമായ നിയമനടപടി തുടങ്ങി. ഒരാഴ്ചക്കുള്ളില്‍ 42 കേസുകള്‍ രജിസ്റ്റര്‍ ചെയ്തതായി ജില്ല പോലീസ് മേധാവി സ്വപ്‌നില്‍ മധുകര്‍ മഹാജന്‍ അറിയിച്ചു. നിരവധിപേര്‍ അറസ്റ്റിലായി. സ്പെഷല്‍ ഡ്രൈവില്‍ ഉള്‍പ്പെടുത്തി റെയ്ഡുകളും കര്‍ശന പരിശോധനകളും തുടരുകയാണ്. ഒപ്പം സംഘടിത കുറ്റകൃത്യങ്ങള്‍ തടയുന്നതിനും ഇത്തരം കേസുകളില്‍ ഉള്‍പ്പെടുന്നവരെ അറസ്റ്റ് ചെയ്യുന്നതിനുമുള്ള പ്രത്യേക ആക്ഷന്‍ ഗ്രൂപ്പിന്‍റെ പ്രവര്‍ത്തനവും നടന്നുവരുന്നതായും ജില്ല പോലീസ് മേധാവി പറഞ്ഞു. ശനിയാഴ്ച വരെയുള്ള കാലയളവില്‍ ജില്ലയിലെ വിവിധ പോലീസ് സ്റ്റേഷന്‍ പരിധിയില്‍ 70 റെയ്ഡുകളാണ് നടന്നത് 42 കേസുകള്‍ രജിസ്റ്റര്‍ ചെയ്തു. മുമ്പ് ഇത്തരം കുറ്റകൃത്യങ്ങളില്‍ ഏര്‍പ്പെട്ട 40പേരെ പരിശോധിച്ചു.
ജില്ല പോലീസ് മേധാവിയുടെ നിര്‍ദേശാനുസരണം ജില്ലയിലെ നോഡല്‍ ഓഫീസറും നാര്‍കോട്ടിക് സെല്‍ ഡിവൈ.എസ്.പിയുമായ ആര്‍. പ്രദീപ് കുമാറിന്‍റെ നേതൃത്വത്തില്‍ ജില്ല ആന്‍റി നാര്‍കോട്ടിക് ടീം (ഡാന്‍സാഫ്) അംഗങ്ങള്‍, ജില്ല തലത്തിലുള്ള ആക്ഷന്‍ ഗ്രൂപ്പ്‌, സംഘടിത കുറ്റ കൃത്യങ്ങള്‍ തടയുന്ന പ്രവര്‍ത്തനത്തില്‍ ഏര്‍പ്പെടുന്ന പോലീസ് സ്റ്റേഷനുകളിലെ പ്രത്യേക സെല്‍, എസ്.എച്ച്‌.ഒമാര്‍ എന്നിവരുടെ സംഘമാണ് റെയ്ഡുകളും മറ്റ് നടപടികളും സ്വീകരിച്ചു വരുന്നത്.
ജില്ലയില്‍ പോലീസ് സ്റ്റേഷന്‍ പരിധികളില്‍ റെയ്ഡുകള്‍ തുടരാനും കേസുകള്‍ പരമാവധി രജിസ്റ്റര്‍ ചെയ്യുന്നതിനും എല്ലാ എസ്.എച്ച്‌.ഒ മാര്‍ക്കും കര്‍ശന നിര്‍ദേശം നല്‍കിയിട്ടുണ്ട്. നടപടികളും ശക്തമായി തുടരുന്നു. ഇത്തരം കുറ്റകൃത്യങ്ങള്‍ ചെയ്യുന്നവരുടെ അനധികൃത വസ്തുവകകള്‍ ഉണ്ടെങ്കില്‍ കണ്ടെത്തി തുടര്‍നടപടി സ്വീകരിക്കും. മുന്‍ കുറ്റവാളികള്‍, പ്രത്യേകം സംശയിക്കുന്നവര്‍ എന്ന വിഭാഗക്കാര്‍ പോലീസ് സ്റ്റേഷന്‍ പരിധികളില്‍ താമസിക്കുന്നുണ്ടെങ്കില്‍ അത്തരക്കാരെ പോലീസ് നിരീക്ഷിക്കുന്നുണ്ട്.
