തിരുവനന്തപുരം : വാവ സുരേഷിന് സിപിഎം വീട് നിര്മ്മിച്ചു നല്കുമെന്ന് മന്ത്രി വി.എന്.വാസവന് പ്രഖ്യാപിച്ചു.അഭയം ചാരിറ്റബിള് ട്രസ്റ്റുമായി സഹകരിച്ചാകും പാര്ട്ടി വീട് നല്കുകയെന്നും മന്ത്രി പറഞ്ഞു. പാമ്പ് കടിയേറ്റ് കോട്ടയം മെഡിക്കല് കോളേജ് ആശുപത്രിയില് ചികിത്സയിലായിരുന്ന വാവ സുരേഷ് ആശുപത്രി വിടുന്ന സമയത്ത് മാധ്യമങ്ങളെ കാണുകയായിരുന്നു. ഈ അവസരത്തിലാണ് മന്ത്രി പാര്ട്ടി തീരുമാനം അറിയിച്ചത്.
ജനങ്ങളുടെ പ്രാര്ത്ഥന മൂലമാണ് ജീവിതത്തിലേക്ക് തിരിച്ചുവരാന് കഴിഞ്ഞതെന്ന് വാവ സുരേഷ് മാധ്യമങ്ങളോട് പറഞ്ഞു. ഗുരുതരാവസ്ഥയില് ആയിരുന്ന വാവ സുരേഷിന് കഴിഞ്ഞ ദിവസങ്ങളിലാണ് ഓര്മ്മശക്തിയും സംസാരശേഷിയും പൂര്ണമായി തിരിച്ചുകിട്ടിയത്. ഇത് തന്റെ രണ്ടാം ജന്മമാണെന്നും അവസരോചിതമായ എല്ലാവരുടെയും ഇടപെടല് മൂലം ആണ് ജീവന് തിരിച്ചുകിട്ടിയതെന്നും വാവ സുരേഷ് പറഞ്ഞു. അതേസമയം അപകടം പറ്റി കിടക്കുമ്പോള് തനിക്കെതിരെ പലരും ക്യാംപെയ്ന് നടത്തിയെന്നും വാവ സുരേഷ് പറഞ്ഞു. ശാസ്ത്രീയമായി പാമ്പ് പിടിക്കുന്നതിനെ കുറിച്ച് ചോദിച്ചപ്പോള് ഒരു രീതിയും പൂര്ണമായി സുരക്ഷിതമല്ലെന്നും പാമ്പ് പിടിത്തം നിര്ത്തുമോ എന്ന ചോദ്യത്തിന് ജീവിതാവസാനം വരെ പാമ്പ് പിടുത്തക്കാരന് ആയിരിക്കാനാണ് ആഗ്രഹമെന്നും വാവ പറഞ്ഞു.
