റാന്നി: റാന്നി സെന്റ് തോമസ് കോളേജില് ബോട്ടണി, സുവോളജി വിഭാഗങ്ങളുടെയും ഭൂമിത്രസേനാ ക്ലബ്ബിന്റെയും സംയുക്ത ആഭിമുഖ്യത്തിൽ കേരളസംസ്ഥാന ജൈവവൈവിധ്യ ബോർഡിന്റെ ധനസഹായത്തോടെ ദേശീയസെമിനാർ സംഘടിപ്പിച്ചു. കോളേജ് മാനേജർ പ്രൊഫ.റോയി മേലേൽ ഉദ്ഘാടനം ചെയ്തു. സെമിനാറിൽ പരിസ്ഥിതിപ്രവർത്തകനും പക്ഷി നിരീക്ഷകനുമായ ഹരി മാവേലിക്കര, ‘തണ്ണീർത്തടവും പക്ഷികളും’ എന്ന വിഷയത്തിലും ചെന്നൈ ഇന്നവോടെക്ക് പ്രൈവറ്റ് ലിമിറ്റഡ് റിസർച്ച് തലവനായ ഡോ. കെ.ആർ ശരവണൻ ‘കണ്ടൽക്കാടുകൾ’ എന്ന വിഷയത്തെക്കുറിച്ചും ക്ലാസ് നയിച്ചു.
തണ്ണീർത്തട സംരക്ഷണത്തിന്റെ പ്രാധാന്യം, ജൈവവൈവിധ്യ സംരക്ഷണത്തിന്റെ വെല്ലുവിളികൾ, പരിസ്ഥിതി സുസ്ഥിരത, തുടങ്ങിയ ആനുകാലികവിഷയങ്ങൾ സെമിനാറിൽ ചർച്ച ചെയ്തു. കോളേജ് പ്രിൻസിപ്പൽ ഡോ. സ്നേഹ എൽസി ജേക്കബ് അധ്യക്ഷത വഹിച്ചു. സുവോളജി വിഭാഗം മേധാവി ഡോ. ആർ അരുണാദേവി, വിദ്യാർത്ഥിയായ അശ്വിൻ കൃഷ്ണ എന്നിവർ പ്രസംഗിച്ചു.
